Bakıda "BakuBuild-2009" 15-ci yubiley Beynəlxalq
inşaat sərgisi açılmışdır
Oktyabrın 21-də Bakıda,
Heydər Əliyev adına İdman-Konsert Kompleksində
Böyük Britaniyanın İTE Group PLC və onun Azərbaycandakı
tərəfdaşı İteca Caspian LLC şirkətlərinin
birgə təşkilatçılığı ilə
"BakuBuild-2009" 15-ci yubiley Beynəlxalq inşaat sərgisi
açılmışdır.
Azərbaycan Respublikası
Fövqəladə Hallar Nazirliyi Tikintidə Təhlükəsizliyə
Nəzarət Dövlət Agentliyi rəisinin müavini Elxan Əsədov,
Ticarət və Sənaye Palatasının vitse-prezidenti Mehman Əhmədov,
İTE Group PLC şirkətinin MDB ölkələri və
Türkiyə üzrə direktoru Edvard Stroon, Türkiyənin
və Böyük Britaniyanın Azərbaycandakı səfirləri
Hulusi Kılıç və Kerolin Braun çıxış
edərək bildirmişlər ki, belə sərgilərin
keçirilməsi dövlətlər arasında iqtisadi əlaqələrin
inkişafında mühüm əhəmiyyətə malikdir,
xarici investisiyaların, müasir texnologiyaların ölkəyə
cəlb edilməsinə böyük təsir göstərir.
Azərbaycanda son illər iqtisadiyyatın sürətli
inkişafı, davamlı ictimai-siyasi sabitlik xarici dövlətlərin
qabaqcıl şirkətləri üçün onu daha cəlbedici
edir. Dünya maliyyə böhranına baxmayaraq, iqtisadi
islahatların geniş vüsət aldığı Azərbaycan
bütün sahələrdə, o cümlədən tikinti sahəsində
yüksək templə inkişaf edir. Çıxış edənlər
əmin olduqlarını bildirmişlər ki, sərgi onun
iştirakçıları üçün səmərəli
olacaq, yeni layihələrin, müqavilələrin
yaranmasına, əməkdaşlığın genişlənməsinə
təkan verəcəkdir.
Qeyd edilmişdir ki, inşaat sərgisində
dünyanın 27 ölkəsindən 270-dək şirkət
iştirak edir və onlardan 30 faizi ilk dəfə sərgidə
təmsil olunur. Sərgi Heydər Əliyev adına
İdman-Konsert Kompleksinin daxili pavilyonunda və kompleksə
bitişik bayır meydançalarda yerləşmişdir.
Sərginin dörd il
ardıcıl olaraq "UFİ" - Dünya Sərgi Sənayesi
Assosiasiyasının keyfiyyət nişanına layiq
görüldüyü qeyd olunmuşdur.
Bildirilmişdir ki,
universallığı ilə seçilən sərgi artıq
15 ildir ki, Qafqazda ən iri inşaat sərgisi olaraq
keçirilir. İştirakçılar ən yeni tikinti
texnologiyaları və təkmilləşdirilmiş inşaat
xidmətləri ilə tanış olacaq, yerli və xarici
tikinti şirkətləri ilə kommersiya əlaqələri
yaratmaq imkanı qazanacaqlar.
Sərgi çərçivəsində
bir sıra ixtisaslaşdırılmış seminarlar, peşəkar
görüş və müzakirələr, yeni texnologiyalar və
inşaat sənətinə həsr olunmuş təqdimatlar təşkil
ediləcək, "Bakıda şəhərsalma siyasəti:
Reallıq və perspektivlər" mövzusunda "dəyirmi
masa" keçiriləcəkdir.
Fövqəladə Hallar Nazirliyinə,
Dövlət Şəhərsalma və Arxitektura Komitəsinə,
Ticarət və Sənaye Palatasına, Azərbaycan Memarlar
İttifaqına, Sahibkarlar (İşəgötürənlər)
Təşkilatları Milli Konfederasiyasına sərginin təşkilinə
göstərilən dəstəyə görə minnətdarlıq
ifadə olunmuşdur.
"BakuBuild-2009" 15-ci Beynəlxalq
inşaat sərgisi ilə yanaşı, "Caspian
MebelExpo" 7-ci mebel, interyer və dizayn sərgisi də
açılmışdır. Burada mətbəx, yataq və
qonaq otaqları mebelləri, eləcə də mebel
istehsalı üçün geniş çeşiddə
aksesuarlar və plitələr təqdim olunur.
Sərginin rəmzi
açılışını bildirən lent kəsildikdən
sonra onun ekspozisiyaları ilə tanışlıq
başlanmışdır.
Beynəlxalq sərgidə Azərbaycan
ilə yanaşı, Türkiyə, İtaliya, Almaniya,
Finlandiya, Yunanıstan, Rusiya, Lüksemburq, Polşa və digər
ölkələri təmsil edən çoxsaylı şirkətlər
də iştirak edirlər.
Səudiyyə Ərəbistanı
Krallığı, Niderland Krallığı və
Rumıniya şirkətləri Bakı sərgisində ilk dəfədir
ki, iştirak edirlər. İran və Litva isə öz milli
stendlərini təqdim edirlər.
Sərginin ekspozisiyalarında
geniş çeşiddə sanitariya texnikası, pəncərə
və qapılar, işıqlandırma, interyer elementləri, bəzək-naxış
materialları, döşəmələr,
yaşıllaşdırma, tikinti texnikası vardır.
Sərgi oktyabrın 24-dək
davam edəcəkdir.
AzərTAc
Azərbaycan.- 2009.- 22 oktyabr.- S. 6.