Xatirə gecəsi

Azərbaycan Dövlət Muğam Teatrında şair Malik Fərruxun xatirə gecəsi keçirilmişdir. Tədbiri teatrın direktoru, əməkdar mədəniyyət işçisi Arif Qaziyev aparırdı.

Mərasimdə şairin qələm dostları və yaxınları iştirak edirdilər. Milli Məclisin deputatı Aydın Mirzəzadə, şair Baba Vəziroğlu, jurnalistlərdən Telli Pənahqızı, Flora Xəlilzadə, fəlsəfə elmlər doktoru, professor Tariyel Qasımov, bəstəkar Mobil Babayev və başqaları çıxış edərək şairin yaradıcılığından, poetik aləmindən söz açdılar. İncəsənət ustaları Malik Fərruxun sözlərinə yazılmış mahnıları ifa etdilər.

Məclisin sonunda şairin övladı, teleaparıcı Günay Malikqızı çıxış edərək atasına göstərilən diqqətə və söylənilən xoş xatirələrə görə təşəkkürünü bildirdi.

Ülviyyə VAHİDQIZI

Azərbaycan.- 2009.- oktyabr.- S. 7.