Azərbaycan Prezidenti İlham Əliyev İranın xarici işlər nazirinin müavini Mehdi Səfərini qəbul etmişdir

Azərbaycan Respublikasının Prezidenti İlham Əliyev oktyabrın 22-də İran İslam Respublikası xarici işlər nazirinin müavini Mehdi Səfərini qəbul etmişdir. Mehdi Səfəri İran İslam Respublikasının Prezidenti Mahmud Əhmədinejadın salamlarını dövlətimizin başçısına çatdırdı.

Seçkilərdən əvvəl Azərbaycanda olduğunu vurğulayan qonaq ötən dövr ərzində ölkəmizdə, xüsusilə Bakı şəhərində çoxlu müsbət dəyişikliklərin baş verdiyini dedi və əldə olunan yüksək nailiyyətlərə görə dövlətimizin başçısını təbrik etdi.

Ölkələrimiz arasında münasibətlərin uğurla inkişaf etdiyini bildirən dövlətimizin başçısı gələcək əməkdaşlıq üçün də yaxşı perspektivlərin olduğunu vurğuladı. Prezident İlham Əliyev Azərbaycan Respublikası ilə İran İslam Respublikası arasında dostluq münasibətlərinin bundan sonra da davam etdiriləcəyinə əminliyini ifadə etdi.

Dövlətimizin başçısı Prezident Mahmud Əhmədinejadın salamlarına görə minnətdarlığını bildirdi, onun da salamlarını İran İslam Respublikasının Prezidentinə çatdırmağı xahiş etdi.

AzərTAc

Azərbaycan.- 2009.- 23 oktyabr.- S. 1.