Dövlət Dumasında Rusiya, Azərbaycan və Ermənistan deputatlarının görüşü olmuşdur

Rusiya, Azərbaycan və Ermənistan deputatları RF Dövlət Dumasında parlamentlərarası əməkdaşlıq, humanitar məsələlər, iqtisadi-ticari əməkdaşlığın spektrinin deputatların iştirakı ilə genişləndirilməsi, miqrasiya prosesləri ilə bağlı mövzuları geniş müzakirə etmişlər.

"Dəyirmi masa" qapalı keçmişdir. Dövlət Dumasının MDB İşləri və Həmvətənlərlə Əlaqələr Komitəsinin məlumatına görə, görüşdə RF Federal Məclisi ilə Azərbaycan və Ermənistan parlamentləri arasında əməkdaşlıq üzrə parlamentlərarası komissiyaların işinin təkmilləşdirilməsi məsələləri geniş müzakirə olunmuşdur. Komitə aparatından bildirmişlər ki, müxtəlif beynəlxalq qurumlarda deputatların fəaliyyətinin əlaqələndirilməsi məsələsinin ətraflı müzakirə olunduğu görüşdə Dağlıq Qarabağ mövzusu da kənarda qalmamışdır.

Görüşü açan Dövlət Duması sədrinin müavini Valeri Yazev ("Yedinaya Rossiya") xalqlar və mədəniyyətlərarası ixtilafları dəf etməyin, mövcud beynəlxalq və daxili münaqişələrin sülh yolu ilə həllinin vacib olduğunu vurğulamışdır.

"Dəyimi masa"da Dövlət Dumasının MDB İşləri və Həmvətənlərlə Əlaqələr Komitəsinin sədri Aleksey Ostrovski, Azərbaycan Milli Məclisinin İnsan hüquqları komitəsinin sədri Rəbiyyət Aslanova, Ermənistan parlamentinin iqtisadi məsələlər üzrə daimi komissiyasının üzvü Ermine Nağdalyan, Azərbaycanın və Ermənistanın Rusiyadakı səfirləri Polad Bülbüloğlu və Armen Smbatyan iştirak etmişlər.

AzərTAc

Azərbaycan.- 2009.- 23 oktyabr.- S. 2.