Azərbaycan QİƏT-də sədrlik etdiyi dövrdə
səmərəli fəaliyyət göstərmişdir
Azərbaycan Qara Dəniz
İqtisadi Əməkdaşlıq Təşkilatında
(QİƏT) sədrlik etdiyi dövrdə çox səmərəli
fəaliyyət göstərmişdir.
Bu fikir oktyabrın 22-də
Bakıda QİƏT-in üzvü olan dövlətlərin
Xarici İşlər Nazirləri Şurasının XXI
iclasının yekunlarına dair keçirilmiş mətbuat
konfransında səslənmişdir.
Azərbaycan xarici işlər
nazirinin müavini Mahmud Məmmədquliyev məlumat
vermişdir ki, iclas çərçivəsində QİƏT-də
sədrlik ölkəmizdən Bolqarıstana keçmişdir.
Bolqarıstan noyabrın 1-dən gələn il mayın 31-dək
QİƏT-də sədrlik edəcəkdir.
M.Məmmədquliyev
bildirmişdir ki, iclas iştirakçıları Azərbaycanın
QİƏT-də sədrliyini müsbət qiymətləndirmiş,
həmçinin təşkilatın fəaliyyətinin səmərəliliyini
artırmağın zəruriliyini vurğulamışlar. Nazir
müavininin sözlərinə görə, Azərbaycan bu
istiqamətdə fəaliyyətini davam etdirir və cari il
noyabrın əvvəllərində Bakıda
Bolqarıstanın sədrliyi ilə QİƏT-in üzvü
olan ölkələrin rabitə və informasiya
texnologiyaları nazirlərinin görüşü
keçiriləcəkdir.
Mətbuat konfransında
çıxış edən Bolqarıstanın xarici işlər
naziri Rumyana Jeleva bildirmişdir ki, ölkəsinin QİƏT-də
sədrliyi dövründə əsas prioritetləri təşkilatın
fəaliyyətinin səmərəliliyi və QİƏT-Avropa
İttifaqı münasibətlərinin genişləndirilməsi
olacaqdır. Bu istiqamətdə Avropa Komissiyasının
QİƏT-in işinə cəlb olunması, həmçinin
təşkilatda müşahidəçi statusu ilə təmsil
olunmuş Avstriya, Almaniya, Fransa və Çexiya ilə
münasibətlərin genişləndirilməsi nəzərdə
tutulur.
QİƏT-in baş katibi Leonidas
Xrizantopulos demişdir ki, Bakıda QİƏT-in üzvü
olan dövlətlərin Xarici İşlər Nazirləri
Şurasının XXI iclası uğurla keçmişdir.
Ümidvaram ki, bu iclas təşkilatın daha da
inkişafına müsbət təsir göstərəcəkdir.
Azərbaycan təşkilata sədrlik etdiyi dövrdə
çox səmərəli fəaliyyət göstərmişdir.
Azərbaycan qurumun fəaliyyətinin səmərəliliyini
artırmaq üçün təkliflər irəli
sürmüşdür və Bolqarıstanın QİƏT-də
sədrliyi dövründə bu təkliflər müzakirə
olunacaqdır.
AzərTAc
Azərbaycan.- 2009.- 23 oktyabr.- S. 4.