Bakıda Azərbaycan arıçılıq məhsullarının VII sərgi-satış yarmarkası açılmışdır

Almaniya Texniki Əməkdaşlıq Cəmiyyətinin (GTZ) dəstəyi və "Qızıl pətək" QHT-nin təşkilatçılığı ilə paytaxtımızda "Azərbaycan arıçılıq məhsullarının VII sərgi-satış yarmarkası" açılmışdır. Kapellhausda (Alman-Azərbaycan Mədəniyyət Birliyi) GTZ-in özəl sektorun inkişafı proqramına uyğun olaraq keçirilən tədbirdə 20-yə yaxın şəhər və rayondan 50-dən çox arıçı iştirak edir.

Yarmarkada müxtəlif çeşidli və keyfiyyətli balla yanaşı, arı südü, güləm, vərəmum, arı çörəyi, möhür və digər arıçılıq məhsulları satılır. Qiymətlər də çox münasibdir. Keyfiyyətindən asılı olaraq bir kiloqram balın qiyməti 20-50 manat arasında dəyişir. Ən qiymətli bal 100 faiz təbii hesab edilən meşə balıdır.

Atalar nahaq yerə "Bal min bir dərdin dərmanıdır" deməyib. Hər bir bal məhsulunun insan orqanizmi üçün müəyyən müalicəvi əhəmiyyəti vardır. Arıçıların dediyinə görə, cökə balı ürək-damar xəstəliklərinə olduqca xeyirlidir. Həm də qaraciyərin fəaliyyətini tənzimləyir. Dağ çiçəklərinin balı isə uşaqların sümüyünü bərkidir, zehni inkişaf etdirir. "Arı çörəyi"nin tərkibində insan orqanizmi üçün lazımlı olan 40 faiz təbii kale, 17 faiz dəmir, 17 faiz kalsium var. Bu məhsuldan infarkt və insult kimi xəstəliklərin müalicəsində, ürək-damar sisteminin möhkəmləndirilməsində istifadə edilir. Möhür balın qaymağıdır. Yeməkdən sonra çeynəməklə ağız boşluğu və nəfəs yollarını təmizləmək, ağ ciyəri müalicə etmək olar. Yonca, çəmən və digər bal növləri də müalicəvi xüsusiyyətləri ilə seçilir.

Xanımlar yarmarkada baldan hazırlanmış təbii kosmetik kremlər və üz üçün maskalar əldə edə bilərlər.

Hər il ölkəmizdə təxminən 1300 tona yaxın bal istehsal olunur ki, bu da normal göstəricidir. Arıçılıqda təsərrüfatların genişləndirilməsi, ümumiyyətlə, arıçılığın inkişafı üçün damazlıq ana arıların yetişdirilməsi əsas şərtdir. "Arıçılıq haqqında qanun"un icrası nəticəsində buna nail olunacağına ümid edilir.

Satış-sərgi yarmarkası oktyabrın 25-dək davam edəcəkdir.

AzərTAc

Azərbaycan.- 2009.- 23 oktyabr.- S. 4.