Ali Məhkəmənin sədri ATƏT-in Bakı ofisinin rəhbəri ilə görüşmüşdür

Oktyabrın 22-də Ali Məhkəmənin sədri Ramiz Rzayev ATƏT-in Bakı ofisinin rəhbəri Əli Bilge Cankorel ilə görüşmüşdür.

Görüşdə R.Rzayev Azərbaycanın məhkəmə sistemi haqqında məlumat vermiş, Ali Məhkəmənin strukturu və fəaliyyəti barədə danışmışdır. Ali Məhkəmənin ATƏT, xüsusilə Avropa İnsan Haqları Məhkəməsi ilə işgüzar əlaqələrini qeyd etmişdir.

ATƏT-in Bakı ofisinin rəhbəri Əli Bilge Cankorel Azərbaycanda məhkəmə sisteminin müasirləşdirilməsi istiqamətində həyata keçirilən tədbirləri yüksək qiymətləndirmiş, ATƏT-lə qarşılıqlı əlaqələrin bundan sonra da davam etdiriləcəyini vurğulamışdır.

ATƏT-in Bakı ofisinin rəhbəri Ali Məhkəmənin yüksək statusuna uyğun yeni inzibati binasını gəzərək məhkəmə tarix muzeyinə baxmış, hakimlərin iş şəraiti ilə tanış olmuş, bu tanışlıqdan məmnun qaldığını bildirmişdir.

Ali Məhkəmənin sədri Azərbaycanın məhkəmə orqanlarına xüsusi maraq və diqqət göstərdiyinə, həmçinin əhəmiyyətli görüşə görə ATƏT-in Bakı ofisinin rəhbərinə minnətdarlığını bildirmiş və gələcək işlərində uğurlar arzulamışdır.

AzərTAc

Azərbaycan.- 2009.- 23 oktyabr.- S. 6.