Böyük Britaniya parlamentində "Avropanın enerji geosiyasəti və Azərbaycanın rolu" mövzusunda tədbir keçirilmişdir

Azərbaycanın Böyük Britaniyadakı səfirliyindən verilən məlumatda bildirilir ki, oktyabrın 20-də Böyük Britaniya parlamentində Britaniya Azərbaycanlıları Şəbəkəsinin (UK Azeris Network-UKAN) təsis olunması ilə əlaqədar "Avropanın enerji geosiyasəti və Azərbaycanın rolu" mövzusunda tədbir keçirilmişdir.

Səfirliyin dəstəyi ilə keçirilmiş tədbirdə parlamentin Lordlar və Nümayəndələr palatalarının üzvləri, dövlət qurumlarının təmsilçiləri, enerji üzrə aparıcı ekspertlər, jurnalistlər, Londonda yaşayan azərbaycanlı və türk icmalarının üzvləri iştirak etmişlər.

Tədbiri açan UKAN-ın həmtəsisçisi Gülçöhrə Əliyeva yeni yaradılan qurumun məqsədi və gələcək fəaliyyət istiqamətləri haqqında məlumat vermiş və təşkilatın Britaniya azərbaycanlılarının daha da sıx birləşməsinə və ölkəmizin maraqlarının bu ölkədə müdafiə edilməsinə xidmət edəcəyini diqqətə çatdırmışdır.

Səfir F.Qurbanov çıxış edərək yeni təsis olunan quruma uğurlar arzulamış və ölkədə fəaliyyət göstərən diaspor təşkilatlarının Azərbaycan reallıqlarının Britaniya ictimaiyyətinə çatdırılmasında xüsusi rol oynadıqlarını vurğulamışdır. Diplomat Azərbaycanın dünya enerji bazarında getdikcə artan rolunu, etibarlı tərəfdaş kimi tanındığını və bu amillərin gələcəkdə ölkəmizin enerji sahəsində yeni layihələrin həyata keçirilməsinə təminat yaratdığını diqqətə çatdırmışdır.

Tədbirdə çıxış edən Britaniya parlamentinin üzvü Alan Vaythed, UKAN-ın həmtəsisçisi Fiyaz Muğal, ARDNŞ-in London nümayəndəliyinin direktoru Rüfət Əfəndiyev, Birmingem Universitetinin professoru Ceremi Smit və London Universitetinin professoru Bavna Deyv Azərbaycanda neft sənayesinin inkişaf tarixi, ölkəmizin Avropanın enerji təhlükəsizliyinin təmin olunmasında oynadığı rol, Xəzər hövzəsi və xüsusilə Azərbaycanın dünya enerji siyasətində artan nüfuzundan bəhs etmişlər. Tədbir iştirakçılar üçün təşkil olunmuş ziyafətlə davam etdirilmişdir.

Azərbaycan.- 2009.- 23 oktyabr.- S. 6.