"Embassy" qəzetində Azərbaycanın Kanadadakı səfirinin müsahibəsi dərc edilmişdir

Azərbaycanın Kanadadakı səfirliyinin mətbuat xidmətindən bildirmişlər ki, "Embassy" qəzetinin 21 oktyabr tarixli nömrəsində səfir Fərid Şəfiyevin müsahibəsi dərc olunmuşdur.

"Həssas bölgədə ictimai diplomatiya" ("Public diplomacy in a fragile region") başlıqlı məqalənin müəllifi qeyd edir ki, Azərbaycanın Rusiya, Ermənistan, Gürcüstan və İranla həmsərhəd ölkə olduğunu nəzərə alaraq, azərbaycanlılar təcrübəli diplomatlar olmalıdırlar.

Səfir F.Şəfiyev müsahibəsində Azərbaycanın tarazlı xarici siyasət yürütdüyünü, ABŞ və NATO ilə fəal əməkdaşlıq qurduğunu diqqətə çatdırmış, Türkiyə-Ermənistan yaxınlaşmasının Ermənistan və Azərbaycan arasında münasibətlərə müsbət təsir etməyəcəyini bildirmişdir. O, azərbaycanlıların öz doğma torpaqlarına qayıtmaq hüququnu vurğulamış, Dağlıq Qarabağın Azərbaycan və erməni icmasının birgə, dinc yanaşı yaşayışının təminatını vacib saymışdır.

Səfir həmçinin Kanada-Azərbaycan parlamentlərarası qrupunun fəaliyyətindən danışmış, qeyri-neft sektorunda, xüsusilə kənd təsərrüfatı sahəsində əməkdaşlıq üçün geniş potensialın olduğunu nəzərə çarpdırmışdır.

Müsahibədə Fərid Şəfiyev ictimai diplomatiyanın vacibliyini də qeyd etmiş, ölkə ictimaiyyəti arasında Azərbaycan haqqında biliklərin təşviqinə əsas diqqətin ayrılacağını bildirmişdir.

AzərTAc

Azərbaycan.- 2009.- 23 oktyabr.- S. 6.