Azərbaycan Prezidenti İlham Əliyev İtaliyanın ölkəmizdə yeni təyin olunmuş səfiri Mario Corco Stefano Baldinin etimadnaməsini qəbul etmişdir

Azərbaycan Respublikasının Prezidenti İlham Əliyev oktyabrın 23-də İtaliya Respublikasının ölkəmizdə yeni təyin olunmuş fövqəladə və səlahiyyətli səfiri Mario Corco Stefano Baldinin etimadnaməsini qəbul etmişdir.

Səfir fəxri qarovul dəstəsinin qarşısından keçdi.

Mario Corco Stefano Baldi etimadnaməsini Prezident İlham Əliyevə təqdim etdi.

Sonra Azərbaycan Prezidenti İlham Əliyev səfirlə söhbət etdi.

Azərbaycan ilə İtaliya arasında münasibətlərin inkişafından məmnunluğunu bildirən dövlətimizin başçısı əlaqələrimizin müxtəlif sahələri əhatə etdiyini bildirdi. Prezident İlham Əliyev ölkələrimiz arasında siyasi sahədə yaxşı qarşılıqlı anlaşmanın və dəstəyin olduğunu dedi. İtaliya şirkətlərinin Azərbaycandakı fəaliyyətinə toxunan dövlətimizin başçısı iqtisadi sahədə əməkdaşlığımızı daha da inkişaf etdirmək üçün yaxşı potensialın mövcudluğunu qeyd etdi. İtaliyanın ölkəmiz üçün Avropada və dünyada ən mühüm tərəfdaşlardan biri olduğunu vurğulayan Prezident İlham Əliyev ümidvar olduğunu bildirdi ki, Mario Corco Stefano Baldi səfirlik fəaliyyəti müddətində əlaqələrimizin daha da möhkəmlənməsi işinə öz töhfəsini verəcəkdir.

Səfir Mario Corco Stefano Baldi ölkələrimiz arasında münasibətlərin yüksək səviyyədə olduğunu vurğuladı. Azərbaycanın və İtaliyanın işgüzar dairələri arasında yaxşı əməkdaşlığın mövcudluğunu bildirən səfir siyasi sahədə əlaqələri daha da inkişaf etdirmək üçün qarşılıqlı səfərlərin əhəmiyyətini qeyd etdi. Mario Corco Stefano Baldi diplomatik fəaliyyəti müddətində əlaqələrimizin daha da inkişaf etdirilməsi üçün əlindən gələni əsirgəməyəcəyini bildirdi.

AzərTAc

Azərbaycan.- 2009.-24 oktyabr.- S. 1.