Lüksemburqda Avropa İttifaqı-Azərbaycan Əməkdaşlıq Şurasının 10-cu iclası keçirilmişdir

Xarici İşlər Nazirliyinin mətbuat xidmətindən bildirmişlər ki, nazir Elmar Məmmədyarov Avropa İttifaqı-Azərbaycan Əməkdaşlıq Şurasının 10-cu iclasında iştirak etmək üçün oktyabrın 26-da Lüksemburqa gəlmişdir.

Nazir E.Məmmədyarov səfər çərçivəsində əvvəlcə İsveçin xarici işlər naziri Karl Bildt, İspaniyanın Avropa məsələləri üzrə dövlət katibi Dieqo Lopez Qarrido, Avropa İttifaqının Ümumi Xarici və Təhlükəsizlik Siyasəti üzrə ali nümayəndəsi Xavyer Solana, Avropa Komissiyasının nümayəndələri və Cənubi Qafqaz ölkələrinin xarici işlər nazirlərinin görüşündə iştirak etmişdir.

Görüşdə Avropa İttifaqı ilə Cənubi Qafqaz ölkələri arasında münasibətlərin indiki vəziyyəti və inkişaf perspektivləri, Şərq Tərəfdaşlığı Təşəbbüsü çərçivəsində əməkdaşlıq, xüsusilə də Aİ ilə assosiativ sazişlərin hazırlanması, habelə Cənubi Qafqaz regionunda mövcud münaqişələrin nizamlanması ətrafında fikir mübadiləsi aparılmışdır. Nazir E.Məmmədyarov Azərbaycanın müxtəlif sahələrdə Aİ ilə əməkdaşlığın dərinləşməsində maraqlı olduğunu, bu istiqamətdə ölkəmizin Şərq Tərəfdaşlığı Təşəbbüsünə böyük önəm verdiyini bildirmişdir. Ermənistan-Azərbaycan, Dağlıq Qarabağ münaqişəsinin nizamlanmasına toxunan nazir E.Məmmədyarov bu prosesdə irəliləyişin əldə edilməsi üçün, ilk növbədə, Azərbaycanın işğal olunmuş ərazilərindən Ermənistan qoşunlarının çıxarılmasının vacibliyini bildirmişdir.

Növbəti görüş Avropa İttifaqının Ümumi Xarici və Təhlükəsizlik Siyasəti üzrə ali nümayəndəsi Xavyer Solana ilə olmuşdur. Görüşdə Avropa İttifaqı-Azərbaycan əməkdaşlığı, regional məsələlər, xüsusilə də Ermənistan-Azərbaycan, Dağlıq Qarabağ münaqişəsinin nizamlanması prosesi ətrafında fikir mübadiləsi aparılmışdır. E.Məmmədyarov münaqişənin nizamlanması ilə bağlı danışıqlar prosesi, məsələyə dair ölkəmizin mövqeyi barədə məlumat vermişdir. Nazir E.Məmmədyarov bildirmişdir ki, Azərbaycanın işğal olunmuş ərazilərindən Ermənistan qoşunlarının çıxarılması bölgədə bütün kommunikasiyaların açılmasına, sülhün və təhlükəsizliyin bərqərar olunmasına, regional inkişaf və əməkdaşlığa imkan yaradacaqdır. Xavyer Solana münaqişənin həlli üçün danışıqlarda dinamikliyin vacibliyini vurğulamış və Avropa İttifaqının nizamlanma prosesinin müsbət inkişafı üçün mümkün addımlar atmağa hazır olduğunu bildirmişdir.

Sonra Avropa İttifaqı-Azərbaycan Əməkdaşlıq Şurasının 10-cu iclası keçirilmişdir. İclasda Avropa İttifaqını hazırda bu quruma sədrlik edən İsveçin xarici işlər naziri Karl Bildt, 2010-cu ilin yanvar-iyun aylarında Aİ-yə sədrlik edəcək İspaniyanın Avropa məsələləri üzrə dövlət katibi Dieqo Lopez Qarrido və Xarici Əlaqələr və Avropa Qonşuluq Siyasəti üzrə Avropa komissarı xanım Benita Ferrero-Valdner təmsil etmişlər. İclasda Avropa İttifaqı-Azərbaycan münasibətlərinin ölkələrin suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığına hörmət əsasında inkişaf etdirilməsinin vacibliyi vurğulanmışdır. Görüşdə Azərbaycan Prezidenti İlham Əliyevin Brüsselə səfərinin Azərbaycan-Avropa İttifaqı əməkdaşlığına böyük təkan verdiyi xüsusi qeyd olunmuşdur. Şərq Tərəfdaşlığı Təşəbbüsü alqışlanaraq bu proqramın Avropa İttifaqı ilə Azərbaycan arasında münasibətlərin daha da inkişaf etdirilməsinə təkan verəcəyi bildirilmişdir. Tərəflər əməkdaşlığın daha da dərinləşməsi üçün assosiativ sazişin əhəmiyyətini vurğulamışlar.

İclasda Ermənistan-Azərbaycan münaqişəsinin nizamlanması prosesi ətrafında son vəziyyət müzakirə olunmuşdur. Münaqişənin nizamlanması prosesi barədə ətraflı məlumat verən nazir E.Məmmədyarov bildirmişdir ki, işğal olunmuş ərazilərdən Ermənistan qoşunları çıxarılmadan sərhədlərin açılması və kommunikasiyaların bərpası regiona davamlı sülh və sabitlik gətirməyəcəkdir. Çünki problemin mahiyyətini təşkil edən Azərbaycanın ərazilərinin işğalı faktı hələ də aradan qaldırılmamışdır.

Görüşdə Avropa İttifaqı ilə Azərbaycan arasında enerji sahəsində əməkdaşlıq məsələsi də müzakirə olunmuş, Avropanın enerji təhlükəsizliyi, enerji daşıyıcılarının nəqlinin şaxələndirilməsində Azərbaycanın rolu qeyd edilmişdir. İclasda BMT-nin Baş Məclisində Azərbaycanın təklif etdiyi "Transmilli Avrasiya super informasiya magistralı" qətnamə layihəsinə Avropa İttifaqı tərəfindən dəstək veriləcəyi qeyd olunmuş, habelə Azərbaycan Respublikası Xarici İşlər Nazirliyinin Diplomatik Akademiyasında Avropa Tədqiqatları Mərkəzinin yaradılması barədə razılıq əldə edilmişdir. Görüşdə həmçinin demokratik islahatlar prosesinin Azərbaycanın suverenliyinin gücləndirilməsi üçün əhəmiyyəti vurğulanmışdır.

Sonra Avropa İttifaqı Şurasının, Avropa Komissiyasının nümayəndələri, həmçinin Azərbaycan, Gürcüstan və Ermənistan xarici işlər nazirlərinin birgə mətbuat konfransı keçirilmişdir.

Səfər çərçivəsində nazir E.Məmmədyarov ATƏT-in Minsk qrupunun həmsədrləri və ATƏT-in fəaliyyətdə olan sədrinin Dağlıq Qarabağ münaqişəsi üzrə xüsusi nümayəndəsi ilə görüşmüşdür. Tərəflər Azərbaycan və Ermənistan prezidentlərinin Kişinyov görüşü, danışıqların hazırkı mərhələsi və həmsədrlərin regiona növbəti səfəri məsələlərini müzakirə etmişlər.

Səfər çərçivəsində nazir E.Məmmədyarov Lüksemburqun Deputatlar Palatasının sədri Laurent Mosar ilə görüşmüşdür. Görüşdə Azərbaycan-Lüksemburq əlaqələrinin mövcud vəziyyəti və inkişaf perspektivləri ilə bağlı fikir mübadiləsi aparılmışdır. Tərəflər iki ölkə arasında münasibətlərin dinamik şəkildə inkişafından, xidmətlər, xüsusilə də maliyyə-bank və nəqliyyat sahələrində uğurlu əməkdaşlıq nümunələrindən məmnunluqlarını bildirmişlər. Təmasların daha da genişləndirilməsi üçün qarşılıqlı səfərlərin intensivləşdirilməsi, ölkələrin mövcud iqtisadi imkanlarından daha səmərəli istifadə edilməsi, habelə mədəniyyətlərin qarşılıqlı təşviqi üçün müxtəlif tədbirlərin keçirilməsinin məqsədəuyğunluğu bildirilmişdir. Tərəflər parlamentlərarası əməkdaşlığın inkişaf etdirilməsinin və bu istiqamətdə qarşılıqlı səfərlərin təşkilinin də vacibliyini vurğulamışlar. Nazir E.Məmmədyarov ölkəmizdə gedən inkişaf prosesi, Azərbaycanın təşəbbüskarı və iştirakçısı olduğu strateji layihələr, ölkəmizin regional əhəmiyyəti barədə ətraflı məlumat vermişdir. L.Mosar Azərbaycanda gedən inkişaf proseslərini diqqətlə izlədiyini, ölkəmizin düzgün istiqamətdə irəlilədiyini və əldə etdiyi nailiyyətləri yüksək qiymətləndirdiyini demişdir. Görüşdə həmçinin Azərbaycan-Avropa İttifaqı əməkdaşlığı, habelə regional vəziyyət, xüsusilə də Ermənistan-Azərbaycan, Dağlıq Qarabağ münaqişəsinin nizamlanması ətrafında da fikir mübadiləsi aparılmışdır.

Səfər çərçivəsində nazir E.Məmmədyarovun son görüşü Fransanın xarici işlər naziri Bernar Kuşner ilə olmuşdur. Görüşdə Azərbaycan-Fransa əməkdaşlığının mövcud vəziyyəti və inkişaf perspektivləri, regional vəziyyət, xüsusilə də Ermənistan-Azərbaycan, Dağlıq Qarabağ münaqişəsinin nizamlanması, Azərbaycan ilə Avropa İttifaqı arasında əməkdaşlıq məsələləri ətrafında fikir mübadiləsi aparılmışdır.

AzərTAc

Azərbaycan.- 2009.- 27 oktyabr.- S. 2.