Çinin Renmin Universitetində beynəlxalq mədəniyyət festivalı keçirilmişdir

Azərbaycan Respublikasının Çin Xalq Respublikasındakı səfirliyindən bildirmişlər ki, Çinin nüfuzlu Renmin Universitetinin şəhərciyində ənənəvi beynəlxalq mədəniyyət festivalı keçirilmişdir.

Müxtəlif ölkələri təmsil edən tələbələrin mədəni əlaqələrini asanlaşdırmaq və ali təhsilin qloballaşdırılmasını təşviq etmək məqsədi daşıyan festival fərqli mədəniyyətlərin qarşılıqlı anlaşmasını və assimilyasiyasını yaxşılaşdırmağa xidmət edir.

Renmin Universitetində təhsil alan digər milllətlərin nümayəndələri ilə yanaşı, azərbaycanlı tələbələr də festivalda iştirak etmişlər.

Azərbaycanın Çindəki səfirliyinin dəstəyi ilə tələbələrimiz ölkəmizin zəngin mədəniyyətini nümayiş və təbliğ etmişlər. Azərbaycana həsr olunmuş stend tədbir iştirakçılarının böyük marağına səbəb olmuşdur. Burada Azərbaycanın mədəniyyəti, təbiəti və reallıqlarını əks edən cəlbedici fotoşəkillər, kitab və jurnallar, musiqi alətləri, milli geyimlər, əl işləri, həmçinin ölkəmizin turizm imkanları nümayiş etdirilmişdir.

Tələbələrdən ibarət rəqs qrupu milli rəqslərimizi ifa etmiş, Azərbaycan mətbəxinin nümunələri nümayiş olunmuşdur.

Tədbirə qatılan Azərbaycanın Çindəki səfiri Yaşar Əliyev Renmin Universitetinin prorektoru xanım Hsüe Xuanbay ilə görüşmüşdür.

Səfir universitetin kitabxanasına Azərbaycanın reallıqlarını əks etdirən kitab, jurnal və CD-lər hədiyyə etmişdir.

Xatırladaq ki, dünyanın müxtəlif ölkələrindən 30 mindən çox tələbənin təhsil aldığı Renmin Universiteti Çin üzrə ümumi reytinqdə beşinci, hüquq, iqtisadiyyat və jurnalistika sahəsində isə birinci yerdədir. Çinin bir çox siyasi rəhbəri və hökumətin yüksək səviyyəli şəxsləri bu universitetin məzunlarıdır.

AzərTAc

Azərbaycan.- 2009.- 27 oktyabr.- S.7.