İqtisadi inkişafı sürətləndirən amillər

Ölkə başçısı İlham Əliyevin son altı ildə apardığı məqsədyönlü siyasət iqtisadiyyatımızın dünyada analoqu olmayan sürətli inkişafını təmin etmiş, vətəndaşlarımızın sosial rifah halı daha da yüksəlmişdir. Dövlət başçısı tərəfindən həyata keçirilən irimiqyaslı islahatlar, imzalanan fərman və sərəncamlar, qəbul edilən qərarlar, reallaşan dövlət proqramları sayəsində Azərbaycan iqtisadi artım göstəricisi ilə dünyanın lider dövlət statusuna yüksəlmişdir.

"Vətəndaş cəmiyyəti quruculuğu, demokratik proseslərin möhkəmləndirilməsi, hüquqi dövlətin formalaşdırılması, heç də şüar və arzu deyil, Azərbaycanın hərtərəfli inkişafının başlıca şərtidir. Bizim təcrübəmiz göstərir ki, Azərbaycanın seçdiyi yol düzgün yoldur" deyən dövlət başçısı hesab edir ki, hazırkı mərhələdə vətəndaşların sosial-siyasi, mədəni və iqtisadi rifahına xidmət edən islahatların davam etdirilməsi zəruridir. Demokratik dövlətin bir təsisat kimi başlıca vəzifəsi, bütövlükdə cəmiyyətin və ayrılıqda hər bir vətəndaşın maddi rifah halının yüksəldilməsi, onların sosial müdafiəsi və layiqli həyat səviyyəsinin təmin olunması, habelə səxsiyyətin azad inkişafı üçün bərabər imkanların yaradılmasıdır.

Hər bir fərdin maraqlarının yüksək səviyyədə təmin olunmadığı cəmiyyətdə güclü dövlət yaratmağın mümkünsüzlüyü fikrini daim önə çəkən ölkə başçısı həyata keçirdiyi genişmiqyaslı islahatlarla Azərbaycanı dinamik inkişaf yoluna çıxarıb. Yeni neft strategiyasının uğurla reallaşdırılması ölkəmizin beynəlxalq aləmdə nüfuzunu yüksəltməklə iqtisadi tərəqqinin əldə olunmasına imkan yaratdı. Böyük uzaqgörənliklə həyata keçirilən neft siyasətinin əsasını da məhz ölkənin proporsional iqtisadi inkişafı, sosial problemlərin həlli, vətəndaş azadlığının və digər demokratik dəyərlərin təmin olunması təskil edirdi.

İqtisadi sahədə əldə olunan nailiyyətlərin effektiv şəkildə sosial sferaya yönəldilməsi müsbət nəticələr verməkdədir. Ölkəmizdə bazar iqtisadiyyatı prinsiplərinin qorunmasi yolu ilə yanaşı, cəmiyyətin aztəminatlı təbəqəsi üçün sosial yardım sisteminin formalaşdırılması, sosial ədalət prinsipinin bütün səviyyələrdə bərqərar olması aparılan sosial siyasət strategiyasının uğurlarından xəbər verir. Sosial sferada yüksək nailiyyətlər əldə etmiş qabaqcıl ölkələrin ən son təcrübəsindən istifadə edilməklə həyata keçirilən layihələr də böyük nəticələr verir. Təsadüfi deyil ki, Azərbaycan bölgədə həm də ən irimiqyaslı sosial layihələri gerçəkləşdirən dövlət kimi tanınır.

"Azərbaycan Respublikası regionlarının sosial-iqtisadi inkişafı Dövlət Proqramı (2009-2013-cü illər)" aztəminatlı ailələrə ünvanlı sosial yardımın göstərilməsi üçün müvafiq tədbirlərin davam etdirilməsi, əhalinin, xüsusilə, gənc ailələrin mənzilə olan ehtiyaclarının daha dolğun ödənilməsi məqsədilə ipoteka kreditləşmə mexanizminin təkmilləşdirilməsi, Qarabağ əlilləri və şəhid ailələrinin mənzil şəraitinin yaxşılaşdırılması, uşaq və ailə mərkəzlərinin, o cümlədən xüsusi istirahət müəssisələrinin və uşaqlar üçün ixtisaslaşmış xidmət müəssisələrinin yaradılması məsələləri əhatə edir.

Ölkə başçısı bu günlərdə Hövsan qəsəbəsində II dünya müharibəsi veteranları, Qarabağ müharibəsi əlilləri və şəhid ailələri üçün inşa olunmuş yaşayış binasının açılışı və minik avtomobillərinin təqdim olunması mərasimində iştirak etmişdir. Xatırladaq ki, 2007-ci ildən tikintisinə başlanmış və yüksək səviyyədə inşa olunan yaşayış binası doqquzmərtəbəlidir və binada 81 mənzil vardır. Binada əlillərin sərbəst hərəkəti üçün liftlər və xüsusi qurğular quraşdırılmışdır. Yaşayış binasının ətrafında abadlıq və yaşıllaşdırma işləri də aparılmışdır. Prezident İlham Əliyev bildirmişdir: "Bu gün Azərbaycan iqtisadiyyatı Ermənistan iqtisadiyyatı ilə müqayisə edilməz səviyyədədir. Biz bütün cəhətlərdə onlardan üstünük. Həm siyasi imkanlarımız çox genişdir, həm beynəlxalq mövqelərimiz çox güclüdür, həm də iqtisadi potensial bir neçə dəfə çoxdur. Hərbi gücə gəldikdə isə, bir daha demək istəyirəm ki, Azərbaycan ordusu bölgədə ən qüdrətli ordudur. Biz hərbi gücümüzü artırırıq. Düzdür, bu, böyük vəsait tələb edir. Ancaq bunu etməliyik. Çünki biz müharibə şəraitində yaşayırıq. Müharibə hələ bitməyib. Müharibənin birinci mərhələsi başa çatıb və biz hər an hazır olmalıyıq ki, öz doğma torpaqlarımızı işğalçılardan azad edək. Bununla bərabər, bu vaxta qədər görülmüş və bundan sonra görüləcək işlər Azərbaycanın hərtərəfli inkişafına xidmət edəcəkdir, Azərbaycanda sosial məsələlərin həllinə şərait yaradacaqdır. Əgər bizim iqtisadi imkanlarımız olmasaydı, Azərbaycan dövləti belə gözəl binalar tikə bilməzdi. Əgər biz öz resurslarımıza arxalanmasaydıq, çətin vəziyyətə düşə bilərdik. Biz başqalarından fərqli olaraq, ancaq daxili imkanlar hesabına yaşayırıq, öz hesabımıza yaşayırıq. Gündən-günə daha da yaxşı yaşayırıq və gələcəkdə qarşıda duran bütün vəzifələr öz həllini tapacaqdır. Belə gözəl binalar hələ çox tikiləcəkdir və buna ehtiyac vardır. Əlimizdən gələni edəcəyik ki, müharibədən əziyyət çəkmiş, öz sağlamlığını, yaxınlarını itirmiş insanlar daim dövlət tərəfindən qayğı ilə əhatə olunsun".

Ölkə başçısının təsdiq etdiyi "Bakı şəhərinin qəsəbələrinin sosial-iqtisadi inkişafının sürətləndirilməsinə dair tədbirlər proqramı" çərçivəsində işlərin ardıcıl həyata keçirilməsi mühüm nəticələrə gətirib çıxarmışdır. Hövsan qəsəbəsində dünya standartları səviyyəsində inşa edilmiş Olimpiya İdman Kompleksi də bu baxımdan mühüm əhəmiyyət kəsb edir. Olimpiya kompleksində idmanın ən müxtəlif növləri üzrə beynəlxalq səviyyəli yarışların keçirilməsi üçün hər cür şərait yaradılmışdır. Respublikamızın bütün bölgələrində ən müasir tələblər səviyyəsində inşa edilən belə idman kompleksləri ölkə rəhbərliyinin bədən tərbiyəsinin və idmanın inkişafına böyük diqqət və qayğı göstərdiyinə əyani sübutdur.

Sosial müdafiəyə ehtiyacı olan təbəqəyə dövlət tərəfindən xüsusi diqqət göstərilməsi hamı tərəfindən müsbət qiymətləndirilir. Aztəminatlı ailələrin, pensiyaçıların, əlillərin sosial müdafiəsinə ayrılan məbləğ ildən-ilə artırılır. Milli sosial sistemin və məşğulluq proqramının inkişafı layihələri uğurla reallaşdırılmaqdadır. Ünvanlı sosial yardım alanların əhatə dairəsi də genişlənmişdir.

Azərbaycanda pensiyalar ildən-ilə artırılır, ünvanlı sosial yardım proqramı uğurla icra olunur. İndi 150 min ailəyə ünvanlı sosial yardım göstərilir və bu proqram 700 min nəfəri əhatə edir. Hər bir ailəyə verilən yardım orta hesabla 140 dollar səviyyəsindədir. Qeyd edək ki, ölkədə ünvanlı dövlət sosial yardımının tətbiqinə başlandığı 2006-cı il iyulun 1-dən bu sahədə yüksək artım müşahidə olunur. 2006-cı ildə dövlət büdcəsindən bu məqsəd üçün 39 milyon manat, 2007-ci ildə 78 milyon manat, 2008-ci ildə isə 127 milyon 500 manat vəsait xərclənmişdir.

Ölkə vətəndaşlarının sosial müdafiəsinin gücləndirilməsi üzrə kompleks tədbirlərin yeni mərhələsində tibbi-reabilitasiya xidmətinin yenilənməsi istiqamətində mühüm işlər həyata keçirilməkdədir. Bu istiqamətdə görülən işlər əlillərin toplum həyata daha fəal şəkildə qatılmasını təmin edəcəkdir. Yəni, onlar da hamı kimi fiziki imkanları çərçivəsində çalışacaq, təhsil alacaq və idmanla məşğul olacaqlar.

2010-2013-cü illəri əhatə edəcək "Aztəminatlı ailələrin sosial reabilitasiyası Dövlət Proqramı" çərçivəsində 13 layihənin də reallaşdırılması nəzərdə tutulur. Əhalinin məşğulluğunun təmini, peşə hazırlığı və yenidən hazırlıq, kiçik biznesə dəstək, məktəbdən işə, kəndli fermer təsərrüfatlarına dəstək, layiqli əməyin təşkili, psixososial reabilitasiya, sosial xidmətin təşkili, tibbi sosial reabilitasiya sahələri əhatə edəcək bu layihələr yoxsulluq problemlərinin tamamilə aradan qaldırılmasına yönəldilib.

Dünyanı bürüyən iqtisadi böhrana baxmayaraq, Azərbaycanda sosial proqramlar uğurla icra olunur. Hazırda mühüm sosial obyektlərin - poliklinikaların, uşaq bağçalarının, məktəblərin tikintisi davam etdirilir və perspektivdə həyata keçiriləcək layihələr üzərində iş gedir. Prezident İlham Əliyev Nazirlər Kabinetinin 2009-cu ilin doqquz ayının sosial-iqtisadi inkişafının yekunlarına həsr olunmuş iclasında demişdir: "Bu ilin doqquz ayında ümümi daxili məhsul 6,1 faiz artmışdır. Bu, çox böyük nailiyyətdir, böyük uğurdur və onu göstərir ki, Azərbaycan iqtisadiyyatı çoxşaxəli iqtisadiyyatdır, iqtisadiyyatın hansısa bir sektorundan asılı deyildir. Son illər ərzində aparılan köklü islahatlar, iqtisadiyyatımzın şaxələndirilməsi istiqamətində atılan praktiki addımlar bugünkü iqtisadi artımı şərtləndirib. Böhranlı ildə iqtisadiyyatın 6,1 faiz səviyyəsində artması çox gözəl göstəricidir. Deyə bilərəm ki, bölgədə yerləşən ölkələrdə iqtisadi tənəzzül 10 faiz, 15 faiz, 18 faiz səviyyəsindədir. Azərbaycanda isə biz bütün imkanları səfərbər edib iqtisadiyyatımızı inkişaf etdiririk ".

Ölkəmizdə həyata keçirilən səmərəli iqtisadi islahatlar kursunun yeni dövrün tələblərinə uyğun daha da zənginləşdirilməsi qarşıda daha böyük perspektivlər açmışdır. Sosial sahədə həyata keçirilən irimiqyaslı layihələr əhalinin rifah halının daha da yaxşılaşmasına, yoxsulluq probleminin aradan qaldırılmasına imkan vermişdir. Nüfüzlu beynəlxalq qurumların açıqladıqları hesabatlarda Azərbaycanda aparılan ardıcıl islahatlar və əldə olunan nəticələr çox yüksək dəyərləndirilmişdir. Bunlar bir daha göstərir ki, ölkə rəhbərliyinin apardığı iqtisadi siyasət strategiyası vətəndaşlarımızın maraqlarına uyğundur və bu siyasət Azərbaycanı daha qüdrətli dövlətə çevirəcəkdir.

E.HACIALIYEV

Azərbaycan.- 2009.- 25 oktyabr.- S. 2.