Naxçıvan Muxtar Respublikası Ali Məclisində müşavirə

Naxçıvan MR Ali Məclisində muxtar respublikada "donuz qripi" virusuna qarşı profilaktik tədbirlərin aparılması ilə əlaqədar müşavirə keçirilmişdir.

Ali Məclisin Sədri Vasif Talıbov müşavirəni açaraq demişdir ki, infeksiya mənşəli "donuz qripi"nin insan sağlamlığına ziyanı ilə bağlı bütün dünyada həyəcan təbili çalınmaqdadır. Bəzi ölkələrdə ciddi məhdudlaşdırıcı tədbirlər görülür, fövqəladə vəziyyət elan olunur, təhsil müəssisələri, məktəblər bağlanır. Muxtar respublikanın yerləşdiyi coğrafi şərait, xarici ölkələrlə gömrük-keçid məntəqələrinin mövcudluğu donuz qripi ilə mübarizə sahəsində təcili tədbirlərin görülməsini tələb edir.

Naxçıvan MR Dövlət Gömrük Komitəsinin sədri, səhiyyə naziri, təhsil naziri, Dövlət Baytarlıq Xidmətinin rəisi, Gigiyena və Epidemiologiya Mərkəzinin direktoru və başqaları çıxış edərək, "donuz qripi" virusuna qarşı həyata keçirilən profilaktik tədbirlər barədə məlumat vermişlər.

Ali Məclisin Sədri müzakirə olunan məsələ ilə əlaqədar müvafiq orqanlara konkret tapşırıqlar vermişdir. Qeyd olunmuşdur ki, Naxçıvan MR Dövlət Gömrük Komitəsi İran və Türkiyə ilə gömrük-keçid məntəqələrində, eləcə də Naxçıvan Beynəlxalq hava limanında nəzarəti gücləndirməli, idxal olunan ərzaq məhsullarının keyfiyyətini yoxlamalı, şübhəli olanların gömrük keçid məntəqələrindən birbaşa stasionar yoxlama müəssisələrinə göndərilməsini təmin etməli, muxtar respublikaya gələn nəqliyyat vasitələrinin dezinfeksiyasını daha da gücləndirməlidir.

Naxçıvan MR İqtisadi İnkişaf Nazirliyi Standartlaşdırma, Metrologiya və Patent üzrə Dövlət Komitəsi ilə birlikdə daxili bazarda, ticarət-iaşə müəssisələrində laborator analizlərin həyata keçirilməsini və müddəti ötmüş ərzaq məhsullarının dövriyyədən çıxarılmasını təmin etməlidir.

Təhsil Nazirliyinə tapşırılmışdır ki, məktəblərdə fəaliyyət göstərən iaşə obyektlərinin fəaliyyətinə gündəlik nəzarəti həyata keçirsin, Səhiyyə Nazirliyi ilə birlikdə şagirdlər arasında yoxlama-profilaktik tədbirlərini genişləndirsin.

AzərTAc

Azərbaycan.- 2009.- 28 oktyabr.- S. 2.