Azərbaycan ilə Bolqarıstan arasında təhlükəsizlik sahəsində ikitərəfli əməkdaşlığın genişləndirilməsi məsələləri müzakirə olunmuşdur

Azərbaycan Respublikasının milli təhlükəsizlik naziri, general-leytenant Eldar Mahmudov Bolqarıstan Respublikasının Milli Kəşfiyyat Xidmətinin direktoru general-mayor Kirço Kirovun dəvəti ilə bu ölkədə səfərdə olmuşdur.

Milli Təhlükəsizlik Nazirliyinin ictimai əlaqələr mərkəzindən bildirmişlər ki, Bolqarıstanın Milli Kəşfiyyat Xidmətinin direktoru bu səfərin ölkələrimizin müvafiq qurumları arasında təhlükəsizlik sahəsində münasibətlərin daha da inkişaf etməsində böyük önəm daşıdığını vurğulamışdır. O, Azərbaycanın təhlükəsizlik orqanlarının yaranmasının 90 illik yubileyi ilə əlaqədar bu ilin aprelində Bakıya səfəri zamanı paytaxtımızda gördüklərindən, xüsusən də dövlətimizin başçısı İlham Əliyevlə görüşdən aldığı dərin təəssüratları diqqətə çatdırmışdır.

Eldar Mahmudov ölkəmizdə təhlükəsizliyin təmin olunması, o cümlədən enerji və nəqliyyat infrastrukturlarının təhdidlərdən qorunması, beynəlxalq terrorçuluqla, narkotiklərin qanunsuz dövriyyəsi, qanunsuz miqrasiya və transmilli mütəşəkkil cinayətkarlığın digər təhlükəli təzahürləri ilə mübarizə sahəsində görülmüş işlər, eləcə də regionda gedən proseslər barədə danışmışdır. E.Mahmudov Ermənistan-Azərbaycan, Dağlıq Qarabağ münaqişəsi və onun ağır nəticələri barədə ətraflı məlumat vermiş, bu problemin nəinki Cənubi Qafqaz, habelə bütün Avropa üçün də ciddi təhdid doğurduğunu vurğulamış, münaqişənin beynəlxalq hüquq normaları çərçivəsində ədalətli həllinin vacibliyini bildirmişdir.

Görüşdə təhlükəsizlik sahəsində ikitərəfli əməkdaşlığın genişləndirilməsi istiqamətində müzakirələr aparılmış, qarşılıqlı maraq doğuran məsələlər üzrə informasiya və ekspert mübadiləsinin intensivləşdirilməsinə dair razılıq əldə olunmuşdur.

Səfər çərçivəsində Eldar Mahmudov Bolqarıstanın vitse-prezidenti Anqel Marin və Baş nazirinin müavini, daxili işlər naziri Tsvetan Tsvetanov ilə görüşmüşdür. Görüşlərdə Bolqarıstan və Azərbaycan arasında bir çox sahələrdə əməkdaşlıq səviyyəsinin, həmçinin dostluq və işgüzar münasibətlərin inkişaf etdirilməsinin hər iki ölkənin rəhbərləri tərəfindən yüksək qiymətləndirildiyi xüsusi vurğulanmış, əlaqələrin bütün istiqamətlərdə, ilk növbədə təhlükəsizlik sahəsində genişləndirilməsi mövzusunda faydalı fikir mübadiləsi aparılmışdır.

AzərTAc

Azərbaycan.- 2009.- 28 oktyabr.- S. 2.