Qarşılıqlı səfərlər münasibətlərin daha da möhkəmlənməsində mühüm rol oynayır

Ölkəmizdə səfərdə olan Türkiyə Böyük Millət Məclisinin Xarici əlaqələr komissiyasının sədri Murad Mərcanın başçılıq etdiyi nümayəndə heyəti oktyabrın 28-də Milli Məclisdə Beynəlxalq əlaqələr və parlamentlərarası münasibətlər komitəsinin üzvləri və bugünlərdə Türkiyəyə səfər etmiş deputatlarla görüşdülər.

Qonaqları səmimiyyətlə salamlayan Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov dedi ki, Azərbaycan parlament nümayəndə heyəti bu yaxınlarda Türkiyədə səfərdə olub və çox səmərəli görüşlər keçirib. Hesab edirik ki, qarşılıqlı səfərlər qardaş və dost ölkələrimiz arasında münasibətlərin daha da yaxşılaşmasında mühüm rol oynayır.

Səmimi görüş üçün təşəkkürünü bildirən Murad Mərcan Azərbaycana səfərdən son dərəcə məmnun olduqlarını dedi. Onun sözlərinə görə, Azərbaycana səfərədə məqsəd parlamentlərimiz arasında, eləcə də digər sahələrdə əlaqələrin daha da genişləndirilməsinə dair fikir mübadiləsi aparmaqdır. Murad Mərcan Milli Məclisə gəlməzdən əvvəl Azərbaycan Prezidenti cənab İlham Əliyevlə görüşdüklərini və bu görüşdən çox məmnun qaldıqlarını diqqətə çatdırdı. Onun sözlərinə görə, Azərbaycan Prezidenti ilə söhbətdə hər iki ölkənin parlamentinin xarici əlaqələr komitələri arasında ildə azı iki dəfə görüş keçirilməsinin vacibliyi vurğulanıb. TBMM-nin Xarici əlaqələr komissiyasının sədri növbəti görüşün Naxçıvanda, sonra isə digər bölgələrdə keçirilməsini təklif etdi.

Murad Mərcan daha sonra dedi: "Türkiyənin Baş naziri Rəcəb Tayyib Ərdoğanın bu ilin mayında Milli Məclisdə söylədiyi kimi, biz Azərbaycan və Türkiyə xalqlarını narahat edəcək, incidəcək heç bir addım atmayacağıq".

Sonra görüşdə qarşılıqlı maraq doğuran digər məsələlər ətrafında geniş fikir mübadiləsi aparıldı.

Azərbaycan.- 2009.- 29 oktyabr.- S. 3.