Azərbaycan "İqtisadi, sosial və mədəni hüquqlar üzrə Beynəlxalq Paktın Fakültativ Protokolu"na qoşulan ilk ölkələrdəndir

Xarici İşlər Nazirliyinin mətbuat xidmətindən bildirmişlər ki, iqtisadi, sosial və mədəni hüquqlar üzrə Beynəlxalq Paktın Fakültativ Protokoluna dair Qeyri-Hökumət Təşkilatları Koalisiyası Azərbaycanın xarici siyasət idarəsinə məktub ünvanlamışdır.

Məktubda Azərbaycanın "İqtisadi, sosial və mədəni hüquqlar üzrə Beynəlxalq Paktın Fakültativ Protokolu"na qoşulan ilk ölkələrdən biri olması və qısa zamanda sənədin Azərbaycan tərəfindən ratifikasiya olunacağına dair təşəbbüslərin qurum tərəfindən dəstəklənməsi öz əksini tapmışdır.

Cari il sentyabrın 25-də Nyu-Yorkda BMT Baş Məclisinin 64-cü sessiyası zamanı keçirilmiş BMT-nin ənənəvi illik müqavilə tədbiri çərçivəsində xarici işlər naziri E.Məmmədyarov Azərbaycan Respublikası adından "İqtisadi, sosial və mədəni hüquqlar haqqında Beynəlxalq Pakta Fakültativ Protokol"u imzalamışdı. 1966-cı ildə qəbul edilmiş "İqtisadi, sosial və mədəni hüquqlar haqqında Beynəlxalq Pakt"a Azərbaycan Respublikası 1992-ci il avqustun 13-də qoşulmuşdu.

2008-ci il dekabrın 10-da BMT Baş Məclisinin müvafiq qətnaməsi ilə qəbul olunmuş "İqtisadi, sosial və mədəni hüquqlar haqqında Beynəlxalq Pakta Fakültativ Protokol"a əsasən, iqtisadi, sosial və mədəni hüquqlar üzrə Komitənin fərdlər, fərdlər qrupu, ya da onların nümayəndələrindən, Paktda əksini tapmış iqtisadi, sosial və mədəni hüquqların pozulması ilə əlaqədar şikayət almaq və onlara baxmaq səlahiyyətini Paktın iştirakçısı olan dövlətlər tanıyır.

Azərbaycan.- 2009.- 29 oktyabr.- S. 3.