Azərbaycan ilə Litvanın xüsusi xidmət orqanları arasında əlaqələrinin inkişafı məsələləri müzakirə olunmuşdur

Azərbaycan Respublikasının milli təhlükəsizlik naziri general-leytenant Eldar Mahmudov Litva Respublikasının Dövlət Təhlükəsizlik Departamentinin baş direktoru Povilas Malakauskasın dəvəti ilə bu ölkədə rəsmi səfərdə olmuşdur.

Milli Təhlükəsizlik Nazirliyinin ictimai əlaqələr mərkəzindən bildirmişlər ki, Litva təhlükəsizlik xidmətinin rəhbəri azərbaycanlı həmkarının bu səfərinin təhlükəsizlik sahəsində ölkələrimiz arasında əlaqələrin daha da inkişaf etdirilməsi istiqamətində atılmış növbəti addım kimi qiymətləndirmişdir. P.Malakauskas Azərbaycan Respublikasının təhlükəsizlik orqanlarının yaranmasının 90 illik yubileyi ilə əlaqədar nazir Eldar Mahmudovun dəvəti ilə bu ilin aprel ayında Bakıya etdiyi səfər zamanı göstərilən qonaqpərvərliyin, xüsusən də dövlətimizin başçısı İlham Əliyevin qəbulunda aldıqları təəssüratın unudulmaz olduğunu bildirmişdir.

Litvada ona göstərilən yüksək qonaqpərvərliyə, keçirilən görüşlərin səmərəli nəticələrinə görə təşəkkürünü bildirən nazir Eldar Mahmudov transmilli mütəşəkkil cinayətkarlığın müxtəlif təzahürlərinə, xüsusən terrorçuluğa qarşı mübarizə, enerji və nəqliyyat təhlükəsizliyi sahəsində görülən işlər barədə danışmışdır.

E.Mahmudov Ermənistan-Azərbaycan, Dağlıq Qarabağ münaqişəsinin regional və beynəlxalq təhlükəsizlik üçün ciddi təhdid doğurduğunu qeyd etmiş, bu problemin tezliklə həll olunmasının vacibliyini və bunun üçün tərəfdaş dövlətlər tərəfindən də səylərin artırılması zərurətini vurğulamışdır.

Görüşdə Litva və Azərbaycan xüsusi xidmət orqanlarının əməkdaşlıq əlaqələrinin yüksələn xətlə inkişafından razılıq bildirilmiş, perspektiv planlar barədə müzakirələr aparılmış, habelə təcrübə və məlumat mübadiləsinin bundan sonra da genişləndirilməsinin vacibliyi qeyd edilmişdir.

Səfər zamanı Litva Respublikasının Baş naziri Andrius Kubilius Azərbaycan Respublikasının milli təhlükəsizlik naziri Eldar Mahmudovu qəbul etmişdir. Görüşdə Litva və Azərbaycan arasında dostluq və əməkdaşlıq münasibətlərinin möhkəmlənməsinin hər iki dövlətin başcıları tərəfindən yüksək qiymətləndirildiyi xüsusi vurğulanmış, ölkələrimizin bütün istiqamətlərdə, o cümlədən xalqlarımız arasında tarixi-mədəni əlaqələrin, həmçinin təhlükəsizlik sahəsində tərəfdaşlığın daha da genişləndirilməsi mövzusunda faydalı fikir mübadiləsi aparılmışdır.

AzərTAc

Azərbaycan.- 2009.- 30 oktyabr.- S. 5.