2016-cı il Olimpiadasının keçirilməsi hüququ uğrunda mübarizə finişə çıxmışdır

2016-cı il Olimpiadasının paytaxtının seçkilərinə düz bir ay qalmış Beynəlxalq Olimpiya Komitəsi dörd namizəd şəhərdə olmuş qiymətləndirmə komissiyasının müfəssəl hesabatını açıqlamışdır.

Komissiyanın 13 üzvü Tokio, Rio-de-Janeyro, Çikaqo və Madrid şəhərlərinə səfər etmiş və 98 səhifəlik sənəd hazırlamışdır. Komissiya üzvləri həmin sənəddə müraciət edənlərin güclü və zəif cəhətləri barədə rəylərini ifadə etmişlər.

Komissiya üzvləri, həmçinin bildirmişlər ki, hələlik 2016-cı il Olimpiadasını keçirmək hüququnu əldə etmək uğrunda mübarizədə aşkar favorit yoxdur. Xatırladaq ki, qalib oktyabrın 2-də Kopenhagendə keçiriləcək sessiyada Beynəlxalq Olimpiya Komitəsinin bütün üzvlərinin üç mərhələli səsverməsi gedişində müəyyənləşdiriləcəkdir.

Qeyd edək ki, Bakı da 2016-cı ilin Olimpiya oyunlarını keçirmək barədə BOK-a müraciət etmişdir.

Azərbaycan.- 2009.- 4 sentyabr.- S. 3.