Alla Puqaçova Bakıya gəlmişdir

 

SSRİ-nin və Rusiya Federasiyasının xalq artisti Alla Puqaçova sentyabrın 3-də Bakıya gəlmişdir. Heydər Əliyev adına Beynəlxalq Hava Limanında müğənnini Mədəniyyət və Turizm Nazirliyinin və mətbuatın nümayəndələri qarşılamışlar.

Hava limanında jurnalistlərin suallarını cavablandıran məşhur müğənni Bakıya növbəti səfərindən məmnun olduğunu bildirərək demişdir: "Bakıda olmağımdam xoşbəxtəm. Qayğısız gəncliyimin ən şirin və sevincli anları Azərbaycanda keçmişdir. Burada mənim çoxlu dostlarım olmuşdur. Demək istəmirəm ki, bu, mənim səhnədə sonuncu konsertimdir".

Yaxın gələcəkdə özünü kinoda, teatrda sınayacağını söyləyən A.Puqaçova "radio Alla" kimi layihələr üzərində işlədiyini söyləmişdir.

A.Puqaçova sentyabrın 4-də Heydər Əliyev Sarayında geniş konsert proqramı ilə çıxış edəcəkdir. Müğənninin 60 illik yubileyinə həsr olunmuş "Apreldən-aprelə" adlı dünya turnesi çərçivəsində keçirilən tədbir yeni mövsümün ilk konserti olacaqdır.

Rusiya səhnəsinin primadonnası Bakıda olduğu müddətdə "Buta Palace"də də konsert verəcəkdir.

 

 

AzərTAc

 

Azərbaycan.- 2009.- 4 sentyabr.- S. 3.