AMEA-nın Radiasiya
Problemləri İnstitutunun laboratoriya müdiri, fizika-riyaziyyat
elmləri doktoru Rəhim Səlim oğlu Mədətovun 60
yaşı tamam olur.
O, Şəki şəhərində
dünyaya göz açmış, orta təhsilini orada
almış, sonra 1966-cı ildə Azərbaycan Dövlət
Universitetinin fizika fakültəsinə qəbul olmuşdur. Ali təhsilini bitirib 2 il Dəvəçi
Rayon Təhsil Şöbəsində işləmişdir.
1973-cü ildə Azərbaycan Milli Elmlər
Akademiyasının Fizika İnstitutunda elmi işçi vəzifəsində
fəaliyyətə başlamış və hazırda
Radiasiya Problemləri İnstitutunda laboratoriya rəhbəri vəzifəsində
çalışır. Elmi fəaliyyətinin ilk
dövründə alternativ enerji mənbələrindən
biri olan günəş enerjisinin elektrik enerjisinə
fotoelektrik üsulu ilə çevrilməsi istiqamətində
tədqiqatlar aparmışdır. Onun elmi fəaliyyətinin əsas
istiqaməti radiasiya fizikasının aktual problemlərindən
olan yarımkeçirici materiallarda radiasiya effektlərinin
müəyyən edilməsi və onların əsasında
yeni praktiki təkliflərin hazırlanmasına həsr
edilmişdir. Bu istiqamətdə aparılan tədqiqat işləri
və elmi layihələr respublikanın əsas elmi-texniki
inkişaf proqramına daxil edilmişdir.
Bu məqsədlə
Fizika İnstitutunda sintez edilmiş yeni xüsusiyyətlərə
malik yarımkeçirici maddələrin xassələrini
araşdırmış və onların əsasında
strukturların alınma texnologiyasının yaradılması
ilə məşğul olmuşdur. İlk tədqiqatlar nəticəsində
R.Mədətov germanium-silisium bərk məhlulu əsasında
pilləli p-n keçidi struktur əsasında yeni tipli günəş
elementinin hazırlanma texnologiyası yaratmış və bu,
ixtira kimi qəbul edilmişdir.
1977-ci ildə EA-nın
Radiasiya Tədqiqatları Sektoruna elmi işçi vəzifəsinə
təyin edilən R.Mədətov elmi tədqiqat işlərində
özünü nəzəri və praktiki cəhətdən
hazırlıqlı eksperimentator kimi göstərmişdir.
1981-ci ildə
"Germanium-silisium bərk məhlulu əsasında
hazırlanmış fotodiodların fotoelektrik xassələri"
mövzusunda namizədlik dissertasiyasını müdafiə
edib SSRİ Ali Attestasiya Komitəsinin qərarı ilə
fizika-riyaziyyat elmləri namizədi adına layiq
görülmüşdür. Onun 1982-1985-ci illər ərzində əldə etdiyi elmi nəticələr
Azərbaycan və SSRİ EA-nın müxtəlif
mükafatları ilə qiymətləndirilmişdir.
1992-ci ildə R.Mədətov
"Germanium-silisium bərk məhlulu əsasında
hazırlanmış p-n keçidlərdə fotovoltanik və
radiasiya effektləri" mövzusunda doktorluq dissertasiyası
müdafiə etmiş və fizika-riyaziyyat elmləri doktoru
adını almışdır. 1994-cü ildən yarımkeçiricilərin radiasiya
fizikası laboratoriyasının rəhbəridir.
R.Mədətov 120 elmi məqalənin,
o cümlədən 15 müəlliflik şəhadətnaməsinin,
2 patentin müəllifidir, 4 elmlər namizədi
hazırlamışdır. Beynəlxalq elmi əməkdaşlıq treninq
kurslarında iştirak etmiş və müvafiq sertifikatlara
layiq görülmüşdür.
R.Mədətov pedaqoji fəaliyyətlə
də məşğul olur. Onun rəhbərliyi ilə H.Əliyev adına Təhsil
Kompleksinin, Naxçıvan və Bakı Türk liseylərinin
şagirdləri 2005-2008-ci illər ərzində Beynəlxalq
Ekoloji olimpiadalarda elmi-layihələrlə iştirak etmiş
və onlar 1 gümüş, bir neçə qızıl və
bürünc medallara layiq görülmüşlər.
O, Azərbaycan
MEA-nın, eyni zamanda, Radiasiya Problemləri İnstitutunun
ictimai işlərində də fəal iştirak edir. 1994-cü ildən RPİ-nin Elmi
Şurasının üzvü seçilmişdir. 1993-cü
ildən institutun Elmi Şurasının və həmkarlar təşkilatı
idarə heyətinin, 2006-cı ildən isə Azərbaycan
Respublikası Prezidenti Yanında Ali Attestasiya Komitəsində
Ekspert şurasının üzvü və elmi katibidir.
R.Mədətova elmi
yaradıcılıqda yeni-yeni uğurlar diləyirik.
Adil QƏRİBOV,
AMEA-nın müxbir üzvü,
əməkdar elm xadimi,
kimya elmləri doktoru, professor
Azərbaycan.- 2009.- 5
sentyabr.- S. 5.