Musiqiçilərimiz "Şərq təranələri" beynəlxalq musiqi festivalında birincilik qazanmışlar

 

YUNESKO-nun təşkilati dəstəyi ilə Səmərqənd şəhərində keçirilən "Şərq təranələri" yeddinci beynəlxalq musiqi festivalı başa çatmışdır.

Bu münasibətlə "Trend" İnformasiya Agentliyində təşkil edilmiş mətbuat konfransı Azərbaycan Milli Elmlər Akademiyası Memarlıq və İncəsənət İnstitutunun böyük elmi işçisi, YUNESKO-nun qeyri-maddi və şifahi mədəni irs üzrə eksperti Sənubər Bağırova bildirmişdir ki, musiqi festivalında dünyanın 50-dən çox ölkəsindən gəlmiş ifaçılar, musiqiçilər, muğam biliciləri və musiqi nəzəriyyəçiləri iştirak etmişlər. İki ildən bir keçirilən festivalda Azərbaycanı "Xarı bülbül" ansamblının müşayiəti ilə gənc xanəndə Qoçaq Əsgərov təmsil etmişdir.

Bildirilmişdir ki, münsiflər heyətinin qərarı ilə Türkmənistandan gəlmiş musiqi kollektivi festivalın ən yüksək mükafatına - "Qran-pri"yə layiq görülmüş, birinci yeri isə Azərbaycan musiqiçiləri tutmuşlar.

Xatırladaq ki, müxtəlif illərdə tanınmış Azərbaycan ifaçıları "Şərq təranələri" beynəlxalq festivalında uğurla çıxış edərək ən yüksək mükafatlara layiq görülmüşlər.

Sonda festival iştirakçıları jurnalistləri maraqlandıran sualları cavablandırmışlar.

 

 

Azərbaycan.- 2009.- 5 sentyabr.- S. 2.