Bakı şəhəri təhsil işçilərinin konfransı keçirilmişdir

Konfrans iştirakçıları əvvəlcə Heydər Əliyev Sarayının qarşısına gələrək, ulu öndərin abidəsi önünə gül-çiçək dəstələri qoymuş, xatirəsini ehtiramla anmışlar.

Müvafiq qurumların, ictimaiyyət nümayəndələrinin, ümumtəhsil müəssisələri rəhbərlərinin qatıldıqları konfransda Bakı Şəhəri üzrə Təhsil İdarəsinin müdiri Nailə Rzaquliyeva məruzə ilə çıxış etmişdir. Məruzəçi ulu öndər, qüdrətli dövlət xadimi Heydər Əliyevin Azərbaycanda təhsilin inkişafına daim böyük önəm verdiyini, ümummilli liderimizin siyasətinin Prezident İlham Əliyev tərəfindən uğurla həyata keçirildiyini xüsusi vurğulamışdır.

Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın Azərbaycan təhsilinə daim diqqət və qayğı göstərdiyi qeyd olunmuşdur.

N.Rzaquliyeva Bakının ümumtəhsil müəssisələrində təhsilin inkişafı, müasir tədris şəraitinin yaradılması, məktəblərin maddi-texniki bazasının möhkəmləndirilməsi istiqamətində həyata keçirilən tədbirlər barədə ətraflı məlumat vermişdir. Bildirmişdir ki, paytaxtın təhsil müəssisələri artıq yeni tədris ilinə hazırdır. Bu il Bakı şəhərinin ümumtəhsil məktəblərində 330 min 500-ə yaxın şagird təhsil alacaqdır. Onların təlim-tərbiyəsi ilə 34 minə yaxın müəllim məşğul olacaqdır. Birinci sinif şagirdlərinin sayı isə 29 minə yaxındır.

Konfransda çıxış edən digər natiqlər də cəmiyyətin tərəqqisində təhsilin mühüm rolunu vurğulamış, yeni dərs ilində müəllim və şagirdlərə uğurlar arzulamışlar.

Sonda Bakı şəhərinin təhsil işçiləri adından Azərbaycan Prezidenti İlham Əliyevə müraciət qəbul edilmişdir.

Təhsil naziri Misir Mərdanov konfransda iştirak etmişdir.

AzərTAc

Azərbaycan.- 2009.- 9 sentyabr.- S. 3.