Sentyabrın 9-da Prezident
İlham Əliyev və xanımı Mehriban Əliyeva Azərbaycan
Dövlət Akademik Opera və Balet Teatrında aparılacaq əsaslı
təmir və yenidənqurma işlərinin eskiz layihəsi ilə
tanış olmuşlar.
Paytaxtımızın mərkəzində
yerləşən bu möhtəşəm sənət
ocağının səhnəsində uzun illər klassik və
müasir əsərlər tamaşaya qoyulmuşdur. Opera və
Balet Teatrının binası təxminən 100 il bundan əvvəl
inşa edilmişdir. O vaxtdan etibarən milli opera sənətində
baş verən mühüm hadisələr bu bina ilə
bağlı olmuşdur. Teatrda Azərbaycan və dünya bəstəkarlarının
ən məşhur əsərləri səhnələşdirilmişdir.
Opera və Balet
Teatrına istər keçmiş SSRİ məkanında, istərsə
də dünya miqyasında şöhrət qazandıran
yalnız zəngin repertuar olmamışdır. Bu teatr
binasının divarları arasında Azərbaycan vokal sənətinin
bir çox parlaq nümayəndəsi yetişib şöhrət
qazanmışdır. Teatr bu gün də Azərbaycanın
möhtəşəm sənət məbədi
missiyasını uğurla davam etdirir.
Məhz buna görə
də Prezident İlham Əliyevin tapşırığına
əsasən teatr binasının tamamilə yenidən
qurulması layihəsi hazırlanmışdır.
Dövlətimizin
başçısına və xanımına binada
aparılacaq əsaslı təmir və yenidənqurma işlərinin
birinci mərhələsinin eskiz layihəsi təqdim olundu.
Bildirildi ki, layihəni
İtaliyanın "Ekstra" şirkəti Mədəniyyət
və Turizm Nazirliyinin Tikilən Obyektlərin Birləşmiş
Müdiriyyəti ilə birgə hazırlamışdır.
Prezident İlham Əliyev
və xanımı Mehriban Əliyeva təmir-bərpa işlərində
istifadə ediləcək İtaliya istehsalı olan tikinti
materiallarının nümunələrinə baxdılar. Bir-birini tamamlayan rəngli materiallar binanı daha baxımlı edəcəkdir.
Sonra dövlətimizin
başçısı layihənin maketinə baxdı. Məlumat verildi ki, teatrın binası, səhnəsi, tamaşa zalı əsaslı şəkildə
yenidən qurulacaq, əlavə yeni inzibati korpus inşa olunacaqdır. Zal və səhnənin
yenidən qurulmasına
İtaliyadan peşəkar
ustalar cəlb ediləcəkdir. Səhnə
ən müasir və çevik texnologiya əsasında qurulacaq, akustika sistemi müasir standartlara uyğunlaşdırılacaq,
avadanlıq dünyanın
ən məşhur şirkətlərindən alınacaqdır.
Prezident İlham Əliyev
teatrın yenidənqurmadan sonrakı vəziyyətini əks etdirən
videoçarxa baxdı. Videoçarxda binanın yeni görkəmi
əks olunmuşdur.
Teatrın binası
dünyanın ən tanınmış sənət
ocaqları ilə müqayisə oluna biləcək səviyyəyə
çatdırılacaqdır. Bu, eyni zamanda, Azərbaycanda
teatr sənətinə marağın artmasında mühüm
rol oynayacaqdır. Teatrın yenidən qurulan binası gündən-günə
abadlaşan və gözəlləşən
paytaxtımıza xüsusi yaraşıq verəcəkdir.
İlkin layihə 6 ay ərzində
təkmilləşdiriləcək və bundan sonra yenidənqurma
işlərinə başlanacaqdır.
Prezident İlham Əliyev
təmir-bərpa işlərinin yüksək keyfiyyətlə
və vaxtında yerinə yetirilməsi ilə bağlı
tapşırıqlarını verdi.
AzərTAc
Azərbaycan.- 2009.- 10 sentyabr.- S. 1.
