Bakı daha bir beynəlxalq tədbirə ev sahibliyi edir

 

Azərbaycan paytaxtı öz ənənəsinə sadiq qalaraq daha bir beynəlxalq tədbirə ev sahibliyi edir.

Bu dəfə Bakı sakinləri və Azərbaycan paytaxtının qonaqları dünyanın tanınmış nəşriyyatlarının, kitab evlərinin çap məhsulları ilə tanış olacaqlar.

Sentyabrın 10-dan 12-dək "Bakı - İslam mədəniyyətinin paytaxtı - 2009" layihəsi çərçivəsində keçiriləcək Birinci Bakı beynəlxalq kitab sərgi-yarmarkasında iştirak etmək üçün artıq şəhərimizə dünyanın 20-dən çox ölkəsindən qonaqlar gəlmişlər.

Muzey Mərkəzinin qarşısında bu möhtəşəm kitab bayramının iştirakçısı olan dövlətlərin bayraqları dalğalanır. Mərkəzin daxilində isə əsl bayram əhval-ruhiyyəsi hökm sürür. Burada zövqlə hazırlanmış müxtəlif stendlərdə 2007-ci ildən bu günədək ölkəmizdə nəşr olunmuş kitablar, dərsliklər, jurnallar sərgilənir.

Muzeyin birinci mərtəbəsində Azərbaycan Respublikasının Prezidenti İlham Əliyevin müvafiq sərəncamı ilə nəşr olunmuş kitablar, həmçinin Mədəniyyət və Turizm Nazirliyinin təşəbbüsü ilə çap edilmiş nəşrlər yer almışdır. Burada "Azərbaycan dünya çapında", "Yaddan çıxmaz Qarabağ" adlı bölmələr yaradılmışdır.

Heydər Əliyev Fondunun müxtəlif səpkili nəşrlər kolleksiyası sərgini daha da zənginləşdirəcəkdir. Fond Azərbaycan həqiqətlərindən, Qarabağ müharibəsinin əsl mahiyyətindən və onun yaratdığı humanitar fəlakətdən, erməni təcavüzü nəticəsində dağıdılmış tarixi-mədəni abidələrimizdən bəhs edən kitabları müxtəlif dillərdə nəşr etdirməklə dünya ictimaiyyətinə obyektiv informasiya çatdırmağa çalışır.

Heydər Əliyev Fondunun dəstəyi ilə milli mənəvi qaynaqlarımız, tarixi keçmişimiz, tanınmış şəxsiyyətlər haqqında nəşr edilən kitabları gənc oxucu auditoriyası üçün zəngin mənbə hesab etmək olar. Fond Azərbaycanın klassik yazıçılarının, tədqiqatçı alimlərin əsərlərini müxtəlif dillərdə nəşr etdirir, xarici ədəbiyyat nümunələrinin dilimizə çevrilərək nəşr olunmasına dəstək verir. Bütün bunlar bir daha sübüt edir ki, Heydər Əliyev Fondunun son illərdə nəşr etdirdiyi kitablar belə beynəlxalq sərgilərdə Azərbaycanın haqq işinə dəstək verməklə yanaşı, məmləkətimizin tanıdılmasına, sevilməsinə əvəzsiz xidmət göstərir.

Üç gün davam edəcək Birinci Bakı beynəlxalq kitab sərgi-yarmarkasında ABŞ, Fransa, İran, Türkiyə, Albaniya, Çin, Kuba, Polşa, Pakistan, Estoniya, Latviya, və MDB-dən olan ölkələrin nəşrləri ilə yanaşı, Azərbaycanda son illərdə çap olunmuş kitablar da nümayiş etdiriləcəkdir. Tədbirə ölkəmizdə fəaliyyət göstərən 60-dan çox çap və poliqrafiya müəssisəsi, çap işi ilə məşğul olan qurumların təmsilçiləri qatılacaqlar. Nəfis tərtibatla, rəngarəng miniatürlərlə nəşr olunmuş bu kitablar oxuculara müxtəlif xalqların böyük dühalarını tanıtmaqla yanaşı, həm də müasir cəmiyyət həyatında aktuallığını itirməyən mövzulara diqqət yetirmək baxımından müstəsna əhəmiyyət daşıyır.

Mədəniyyət və Turizm Nazirliyinin nəşriyyat, reklamın təşkili və informasiya şöbəsinin müdiri Vaqif Bəhmənli demişdir ki, beynəlxalq sərgi çərçivəsində kitab təqdimatları, imza mərasimləri, naşirlər arasında "dəyirmi masa"lar, müəllif görüşlər təşkil ediləcəkdir. Bu cür sərgilərin təşkili gələcəkdə Azərbaycanda kitab nəşri işinin inkişafına güclü təkan verəcəkdir.

Bildirilmişdir ki, sərgi-yarmarka çərçivəsində "Azərbaycan qayaüstü incəsənəti" kitabının, "Mədəniyyət" kataloqunun və "Poeziya günü" toplusunun təqdimat mərasimləri də təşkil olunacaqdır. Silsilə tədbirlər çərçivəsində xalq yazıçısı İsa Hüseynovun (Muğanna) 6 cildlik seçilmiş əsərlərinin, xalq şairi Zəlimxan Yaqubun "Mən öz dastanımı yazıb gəlmişəm" və "Millətdə, dövlətdə, sənətdə" kitablarının təqdimat mərasimi keçiriləcəkdir.

V.Bəhmənli demişdir ki, sərgidə bütün çap işi ilə məşğul olan qurumların iştirakı pulsuzdur və onlar burada öz məhsullarını sata da bilərlər.

 

 

AzərTAc

 

Azərbaycan.- 2009.- 10 sentyabr.- S. 3.