Qarabağda yaşı
yüz iyirmi altıya çatan şərəfli bir ünvan
var - Ağcabədi şəhəri 3 saylı texniki humanitar fənlər
təmayüllü məktəb-lisey. Bu günlər məktəbdə
əsl bayram əhval-ruhiyyəsi yaşanır.
"2008-2009-cu tədris
ilində keçirilmiş ən yaxşı ümumtəhsil
məktəbi" müsabiqəsinin qaliblərinin
mükafatlandırılması haqqında" Azərbaycan
Respublikası Prezidentinin 1 sentyabr 2009-cu il tarixli sərəncamında
bu qocaman təhsil ocağının da adı qaliblərin
sırasındadır. Məktəbin direktoru Tofiq Zeynalova
ünvanlanan təbriklərin sayı-hesabı yoxdur. Tofiq
müəllim sevincini bizimlə də bölüşür:
- 30 ildir direktor işləyirəm.
Həyatımda uğurlar, fərəhli günlər çox
olub. Amma ömrüm boyu, səmimi deyirəm, indiki qədər
sevinməmişəm. Qazanılan qələbə ona görə
bu qədər şirindir ki, orada möhtərəm Prezident
İlham Əliyevin imzası var. Ölkəmizin hər yerində
olduğu kimi, Ağcabədi rayonunda da təhsilə dövlət
qayğısı aydın hiss olunur. Son beş ildə
rayonumuzda 30 yeni məktəb binası tikilmiş, çoxlu
sayda təhsil ocağı əsaslı təmir olunmuşdur. Təhsilin
inkişafında, onun maddi-texniki bazasının möhkəmləndirilməsində
ən böyük təşkilatçı və
yardımçı olan Heydər Əliyev Fonduna, onun prezidenti,
Milli Məclisin deputatı Mehriban xanım Əliyevaya çox
minnətdarıq.
Vətənin, millətin
yolunda çəkdiyin zəhmət, yaşadığın
narahat anlar, keçirdiyin yuxusuz gecələr qiymətləndiriləndə
ürəyinə yeni həvəs, qollarına yeni qüvvət
gəlir. Varlığına sözlə ifadə edə bilmədiyin
bir rahatlıq hopur.
Müstəqil Azərbaycanımızın
işıqlı sabahı üçün layiqli vətəndaşlar
yetişdirmək müəllimlərin ali məqsədidir. Bu
şərəfli məqsədi uğurla reallaşdırmaq
üçün qarşımızda geniş imkanlar
açılmış, əlverişli şərait
yaradılmışdır. Dövlətimizin
qayğısı isə bizə stimul verir. Maddi və mənəvi
maraqlarımız hərtərəfli inkişaf etmiş,
yüksək intellektual səviyyəyə malik yeni nəsil
yetişdirməyə yönəldilmişdir. Bu şərəfli
və məsuliyyətli yolda qazandığımız
uğurlar respublikamızın Prezidenti tərəfindən
layiqincə qiymətləndirilir, yüksək mükafata layiq
görülürsə, ayların, günlərin zəhməti,
ağrı-acısı bir andaca unudulur.
Xoş xəbəri yeni
dərs ili ərəfəsində almışıq. Sevincimiz
böyük olsa da, arxayınlaşmırıq. Buna
haqqımız da yoxdur. Axı, həyat davam edir. Yeni dərs
ilinə nümunəvi hazırlaşmışıq. Məktəbimizin
pedaqoji kollektivi yeni ildə uğurları daha da artırmaq
üçün bütün səylərini, qüvvə və
bacarıqlarını sərf etmək əzmindədir.
Məktəbdə
ömrünü gənc nəslin işıqlı sabahı
üçün şam kimi əridən müəllimlər çoxdur.
Ağcabədidə nurlu ziyalı kimi böyük hörmət
sahibi olan, müəllim adını həmişə uca tutan
Camal Abbasovun, Fazil Alıyevin, Mətanət Quluyevanın, əməkdar
müəllim Zəhra İbrahimovanın, Ballı
Atakişiyevanın bu nailiyyətin qazanılmasında
böyük əməkləri var.
Məzunlarımızdan
bu il 20 nəfər ölkəmizin nüfuzlu ali təhsil
ocaqlarına qəbul olunmuşdur. Məktəbin yetirməsi,
keçən il 686 balla Azərbaycan Tibb Universitetinə daxil
olan Şirin Qəhrəmanlı Prezident təqaüdü
alır. Son on ildə şagirdlərimiz fənn
oimpiadalarının respublika turunda bir qayda olaraq layiqli yerlər
tuturlar. Bu il məktəbin 4 şagirdi fənn
olimpiadalarının respublika turunda qalib gəlmişdir.
Sosial-iqtisadi
inkişafın bütün istiqamətlərində
böyük nailiyyətlər qazanan, hazırda, sözün həqiqi
mənasında, əsl intibah dövrünü yaşayan
Ağcabədidə təhsilin yüksəlişinə
böyük önəm verilir. Son illərin ənənəsinə
uyğun olaraq Ağcabədi Rayon Icra Hakimiyyətinin
başçısı Şahin Məmmədov ölkənin
ali məktəblərinə qəbul olunmuş, 500-dən
yuxarı bal toplayanları fəxri fərmanlar və qiymətli
hədiyyələrlə mükafatlandırmışdır. Qəbulda
şəhər 3 saylı məktəbin məzunu, Azərbaycan
Pedaqoji Universitetinin I kurs tələbəsi Gülbəyi
Paşayeva da çıxış etmiş, qayğı və
diqqətə əla qiymətlərlə cavab verəcəklərini
vurğulamışdır.
İndi qocaman təhsil
müəssisəsində bayram ovqatı yaşanır. "Ən
yaxşı ümumtəhsil məktəbi" müsabiqəsinin
qalibləri yeni qələbələr
sorağındadırlar.
Lazım QULİYEV
Azərbaycan.- 2009.- 10 sentyabr.- S. 5.