Böyük Britaniya və Şimali İrlandiya Birləşmiş Krallığının milli bayramı şərəfinə

Sentyabrın 10-da Böyük Britaniya və Şimali İrlandiya Birləşmiş Krallığının Azərbaycandakı səfirliyi ölkəsinin milli bayramı - Kraliça ülyahəzrət II Elizabetin doğum günü münasibətilə rəsmi qəbul təşkil etmişdir.

Böyük Britaniyanın Azərbaycandakı səfiri Kerolin Braun ölkələrimiz arasında əlaqələrin genişlənməsindən məmnunluğunu bildirərək son vaxtlar əməkdaşlığımızın inkişafının daha da sürətləndiyini vurğulamışdır. Diplomat demişdir ki, Azərbaycan hökumətinin əlverişli investisiya siyasəti britaniyalı sahibkarların diqqətini cəlb edir, müştərək şirkətlərin sayı artır, energetika, təhsil, mədəniyyət sahələrində əlaqələr inkişaf edir. Böyük Britaniya Azərbaycanı özünün strateji tərəfdaşı sayır.

Yaxın vaxtlardan etibarən Azərbaycanın dünya bazarına daha böyük enerji ixrac etməyə başlayacağını diqqətə çatdıran səfir Britaniya şirkətlərinin respublikamızın iqtisadiyyatında, xüsusən də neft və qaz bölməsində uğurla təmsil olunduğunu demişdir.

Sənaye və energetika naziri Natiq Əliyev əlamətdar gün münasibətilə Böyük Britaniya xalqını Prezident İlham Əliyevin adından təbrik edərək dövlətimizin başçısının salamlarını və xoş arzularını çatdırmışdır.

Britaniya şirkətlərinin Azərbaycan iqtisadiyyatında mühüm rol oynadığını vurğulayan N.Əliyev onların ölkəmizin inkişafına böyük töhfələr verdiyini xatırlatmışdır.

Vurğulanmışdır ki, Azərbaycan müstəqilliyini bərpa etdikdən sonra Böyük Britaniya ilə əlaqələrin inkişafına xüsusi diqqət yetirmiş, ümummilli liderimiz Heydər Əliyev bir neçə dəfə dost ölkəyə rəsmi səfər etmiş və dövlətlərimiz arasında dostluq münasibətlərinin inkişafına şərait yaradan sənədlər imzalamışdır. Prezident İlham Əliyev bu ənənəni davam etdirərək Böyük Britaniya ilə münasibətlərin dərinləşməsinə xüsusi diqqət yetirir. Azərbaycan Prezidenti İlham Əliyevin Böyük Britaniya və Şimali İrlandiya Birləşmiş Krallığına cari ilin iyulunda rəsmi səfəri əsası ulu öndərimiz Heydər Əliyev tərəfindən qoyulmuş dostluq və sıx əməkdaşlıq münasibətlərində yeni mərhələ açmışdır.

Qəbulda Azərbaycan Prezidenti Administrasiyasının ictimai-siyasi məsələlər şöbəsinin müdiri Əli Həsənov, Milli Məclisin deputatları, xarici ölkələrin Bakıdakı səfirləri, beynəlxalq təşkilatların ölkəmizdəki təmsilçiləri, paytaxt ictimaiyyətinin nümayəndələri iştirak etmişlər.

Azərbaycan.- 2009.- 11 sentyabr.- S. 2.