Heydər Əliyev Fondu uğurlu layihələr həyata keçirir

2004-cü il may ayının 10-da fəaliyyətə başlayan Heydər Əliyev Fondu ulu öndərin zəngin dövlətçilik irsinin bütün dünyada tanıdılması və təbliği istiqamətində ardıcıl iş aparmaqla yanaşı, cəmiyyətin hərtərəfli inkişafı üçün son dərəcə əhəmiyyətli olan bir sıra xeyirxah və nəcib layihələrin gerçəkləşməsində də yaxından iştirak edir, milyonlarla insanın inam və etimadını qazanır.

Modernləşmə, müasirləşmə, dünyaya inteqrasiya, Azərbaycanın milli maraqlarının müdafiə edilməsi və digər bu kimi məqsədyönlü işlər fondun üzərinə düşən vəzifələrdəndir. Bu ictimai qurum təhsilin, səhiyyənin, mədəniyyətin, incəsənətin, idmanın inkişafına xidmət edən konkret layihələrlə yanaşı, regional inkişaf tədbirlərinə də yaxından dəstək verir. Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə həyata keçirilən "Yeniləşən Azərbaycana yeni məktəb" layihəsi bu baxımdan cəmiyyətdə böyük əks-səda doğurmuşdur. Təhsilin ölkənin gələcəyi üçün olduqca əhəmiyyətli bir sahə olduğunu nəzərə alan fondun rəhbəri bu istiqamətdə möhtəşəm tədbirlərə imza atmış, gənc nəslin formalaşmasına böyük töhfələr vermişdir. Fondun yaradılmasının beş illik yubileyində Prezident İlham Əliyevin qeyd etdiyi kimi, respublikada ilk məktəb tikintisi məhz bu qurumun xətti ilə geniş vüsət almışdır. Sonra həmin təşəbbüs dövlət tərəfindən əsas götürülərək bütün ölkə miqyasında həyata keçirilmişdir.

Fondun "Yeniləşən Azərbaycana yeni məktəb" layihəsi çərçivəsində bu illər ərzində 43770 şagird yerlik 226 yeni məktəb binası tikilmişdir. Bütövlükdə isə 2004-2008-ci illərdə 300-ə yaxın yeni məktəb, internat məktəbi, uşaq bağçası və körpələr evi inşa edilmiş, təmir olunmuş və texniki avadanlıqlarla təchiz edilərək uşaqların ixtiyarına verilmişdir. 2009-cu ildə isə 1600 yerlik 6 məktəb binası tikilmişdir. 40-dan çox təhsil ocağı, o cümlədən xüsusi qayğıya ehtiyacı olan uşaqlar üçün 31 internat məktəbi əsaslı təmir olunub müasir avadanlıqlarla təchiz edilmişdir.

İlk layihələrdən olan "Uşaq evləri və internat məktəblərinin inkişafı" proqramı uşaq müəssisələrində yaşayış və təhsil şəraitinin yaxşılaşmasına, asudə vaxtın səmərəli təşkilinə şərait yaratmışdır.

Nizami rayonundakı 1 nömrəli uşaq evinin nəzdində yaşayış binasının, rayonlarda yataqxanaların istifadəyə verilməsi valideyn himayəsindən məhrum olan 18 yaşına çatmış uşaqların üzləşdiyi mənzil probleminin həllinə kömək məqsədi daşıyır.

Layihə çərçivəsində Bakının Nəsimi rayonundakı 268 nömrəli, həmçinin xüsusi yardımçı məktəb, Nərimanov rayonundakı Psixonevroloji uşaq evi, Əzizbəyov rayonundakı 2 nömrəli yetim və valideyn himayəsindən məhrum olmuş uşaqlar üçün internat məktəbi, əqli və fiziki cəhətdən qüsurlu uşaqlar üçün 3 nömrəli xüsusi məktəb, Şüvəlan qəsəbəsindəki yetim və valideyn himayəsindən məhrum uşaqlar üçün respublika yardımçı internat məktəbi, beyin iflici və polimielit keçirmiş uşaqlar üçün 16 nömrəli internat məktəbi, Türkan qəsəbəsindəki nitqi qüsurlu uşaqlar üçün respublika xüsusi internat məktəbi, Şamaxı internat məktəbi və bir sıra digər uşaq müəssisələri təmir olunmuş və yenidən qurulmuşdur.

Fondun "Təhsilə dəstək" layihəsi əsasında 10 uşaq bağçasında təmir işləri aparılmışdır.

Bu möhtəşəm qurumun xətti ilə məktəblərin tikintisi, əsaslı təmiri, təchizatı sahəsində tədbirlərin həyata keçirilməsi artıq intensiv xarakter almışdır və bu iş davam etdirilməkdədir. Dövrün tələblərinə cavab verən yeni məktəb binaları müasir avadanlıqlar, kompüterlər, zəngin kitabxanalar, istilik sistemi və əyani vasitələrlə təchiz edilmişdir. Layihə əsasında Yevlax rayonunun Hacıselli kəndində 200, Nəmiti kəndində 100 şagird yerlik məktəb binaları tikilib istifadəyə verilmişdir. Eyni zamanda, Düzdağ və Qaraoğlan kəndlərində yeni məktəb binaları ucaldılmış, şəhər 2, 4, 5 və 9 saylı, Yaldili kəndindəki və Aran qəsəbəsindəki məktəblərdə əsaslı təmir-bərpa işləri aparılmışdır. Layihənin ikinci mərhələsində rayonun Bucaq kəndində 200 şagirdlik məktəb binası tikilərək 2007-2008-ci tədris ilində məktəblilərə təhvil verilmişdir.

Yevlax şəhər 6 saylı məktəb üçün 14 sinif otağı, Yuxarı Qarxun kəndində 360 şagird yeri olan yeni məktəb binası inşa edilmişdir.

Samux rayonunun Əhmədbəyli kəndində 240 yerlik, Biləsuvar şəhərində 12 sinif otağından ibarət 200 yerlik, Goranboy şəhərində hər biri 200 yerlik 3 yeni təhsil müəssisəsi, Zaqatala rayonunun Qandax kəndində 240 yerlik, Tərtər rayonunun 2 nömrəli Sancalı kənd orta məktəbində əlavə tədris korpusu, Ağsu rayonunun Novan kəndində 380, Padar və Ərəbmehdibəy kəndlərinin hər birində 240, Gədəli kəndində 480, Hacıqabul rayonunun Qızılburun kəndində 240 yerlik tədris binalarının tikilib istifadəyə verilməsi Mehriban xanım Əliyevanın bu sahəyə göstərdiyi diqqət və qayğısının təzahürüdür.

Respublikamızda 2007-2008-ci tədris ilində Heydər Əliyev Fondunun irəli sürdüyü layihələr çərçivəsində yeni inşa edilmiş bir sıra tədris ocaqları şagirdləri öz qoynuna almışdır. Slavyanka kəndində 260 şagird yerlik beynəlmiləl orta məktəb binasının, Hacıqabulda 32 sinif otağından ibarət 640, Lənkəran rayonunun Digəh kəndində 260, Liman şəhərində 1200, İmişli rayonunun Nurulu kəndində 190 şagird yerlik tədris ocaqlarının inşası məhz təhsilin inkişafına xidmət edir.

Fondun təşəbbüsü ilə Lənkəran rayonunda 3 yeni məktəb binası tikilmiş, 3 məktəbdə 15 əlavə sinif otağı inşa edilmiş, Osman Mirzəyev adına internat məktəbi əsaslı təmir edilərək yeni mebel və avadanlıqlarla təchiz edilmişdir.

Ötən tədris ilində Bakıda və ətraf qəsəbələrdə də fondun layihələri əsasında yeni məktəb binaları istifadəyə verilmişdir. Bakının Pirşağı qəsəbəsindəki 112 nömrəli məktəbin yeni korpusu təhvil verilmiş, texniki avadanlıqlarla təchiz edilmişdir.

Fondun dəstəyi ilə Sabunçu rayonunun Bilgəh qəsəbəsindəki 11 nömrəli internat məktəbində əsaslı yenidənqurma işləri görülmüşdür. 1961-ci ildə tikilmiş və son illərdə yararsız vəziyyətə düşmüş bina təmir olunmuş, yataqxana, yeməkxana, tibbi yardım kabinetləri, idman zalı və meydançaları, üzgüçülük hovuzu, əyləncə mərkəzi, istirahət guşələri yenidən qurulmuşdur. Məktəb kompüter və digər texniki avadanlıqlarla təmin edilmişdir.

Ötən il Mehriban xanım Əliyeva Bakının Nərimanov rayonundakı akademik Zərifə Əliyeva adına uşaq bağçasının açılışında iştirak etmiş, uşaqlar üçün yaradılan şəraitdən razı qaldığını bildirmişdir. Həmin il Badamdar qəsəbəsində 239 nömrəli orta məktəb əsaslı təmirdən sonra şagirdlərin ixtiyarına verilmişdir.

Fondun prezidenti Mehriban xanım Əliyeva bu günlərdə Azərbaycan ilə Polşa arasında dostluq münasibətlərinin inkişafındakı xidmətlərinə görə Polşa Respublikasının "Xidmətlərə görə" Böyük Komandor Xaçı ordeni ilə təltif edilmişdir. Ordeni təqdimetmə mərasimində Heydər Əliyev Fondunun "Yeniləşən Azərbaycana yeni məktəb" layihəsi çərçivəsində Samux rayonunun Sarıqamış kənd orta məktəbinin tikintisinə Polşanın göstərdiyi kömək, habelə Azərbaycanda "Şopen ili"nə Heydər Əliyev Fondunun verdiyi dəstək yüksək dəyərləndirilmişdir.

Adilə QOCAYEVA

Azərbaycan.- 2009.- 16 sentyabr.- S. 3.