Azərbaycan
Respublikasının Prezidenti İlham Əliyev sentyabrın
16-da Böyük Britaniyanın enerji məsələləri
üzrə dövlət naziri Lord Hantın
başçılıq etdiyi nümayəndə heyətini qəbul
etmişdir.
Dövlət naziri Lord
Hant "Əsrin müqaviləsi"nin 15-ci
ildönümü münasibətilə dövlətimizin
başçısına təbriklərini
çatdırdı və bu müqavilənin Azərbaycanın
gələcək inkişafının təminatında önəmli
rol oynadığını dedi. Lord Hant Azərbaycan Prezidenti
İlham Əliyevin bu il iyul ayında Londona rəsmi səfərinin
Böyük Britaniya hökuməti tərəfindən
yüksək qiymətləndirildiyini qeyd etdi.
Ölkəmizdə əldə
olunan inkişaf proseslərinin başlanğıcında "Əsrin
müqaviləsi"nin dayandığını deyən
dövlətimizin başçısı bildirdi ki, 15 il bundan əvvəl
imzalanan bu kontrakt bir çox enerji təşəbbüslərinin,
o cümlədən bu gün Avropada ciddi müzakirə olunan
enerji təhlükəsizliyi ilə bağlı təşəbbüslərin
meydana gəlməsinə səbəb olmuşdur. Prezident
İlham Əliyev Azərbaycanın Böyük Britaniya ilə
energetika sahəsində əməkdaşlığa və
bp-nin bu əməkdaşlıqda oynadığı rola önəm
verdiyini vurğuladı. Dövlətimizin
başçısı bp şirkəti ilə yeni layihələr
üzrə aparılan işləri ötən dövr ərzində
inkişaf edən əlaqələrimizin yaxşı göstəricisi
olduğunu dedi.
Londona sonuncu rəsmi səfəri
zamanı Azərbaycan Dövlət Neft Şirkəti ilə
Böyük Britaniyanın bp şirkəti arasında imzalanan
qarşılıqlı Anlaşma Memorandumuna toxunan Prezident
İlham Əliyev gələcəkdə də birgə layihələr
üzərində işlərin davam etdiriləcəyinə
ümidvar olduğunu bildirdi.
Böyük
Britaniyanın enerji məsələləri üzrə
dövlət naziri Lord Hant dedi: "Biz Sizin bp şirkəti ilə
strateji tərəfdaşlıqla bağlı söylədiyiniz
fikirləri yüksək qiymətləndiririk və bu əməkdaşlığa
bundan sonra da dəstək verəcəyik". Bu tərəfdaşlığın
dünyada bir nümunə ola biləcəyini vurğulayan Lord
Hant əməkdaşlığımızın bundan sonra da
möhkəmlənəcəyinə əminliyini bildirdi.
AzərTAc
Azərbaycan.- 2009.- 17 sentyabr.- S. 3.