Azərbaycanın bütün bölgələri inkişaf edir, abadlaşır, müasirləşir

Prezident İlham Əliyev Bakı- Quba-Rusiya Federasiyası dövlət sərhədi avtomobil yolunun 16-134-cü kilometrinin açılışında iştirak etmişdir

Sentyabrın 18-də Prezident İlham Əliyev Bakı-Quba-Rusiya dövlət sərhədi avtomobil yolunun 16-134-cü kilometrinin açılışında iştirak etmişdir.

Yolun yenidən qurulmasına “Akkord” şirkətlər qrupu 2008-ci ilin mayında başlamışdır. Ötən ilin avqustunda Bakı-Quba-Rusiya Federasiyası dövlət sərhədi avtomobil yoluna daxil olan Bakı-Sumqayıt yolu, bu ilin fevralında isə yolun 11-ci kilometrində tunel tipli yolütörücüsü və 16-cı kilometrində körpü tipli yolötürücüsü dövlətimizin başçısının iştirakı ilə istifadəyə verilmişdi.

Bakı-Quba-Rusiya Federasiyası dövlət sərhədi avtomobil yolunun 16-134-cü kilometri beton örtük tikilməklə yenidən qurulmuşdur. Ötən dövrdə 118 kilometrlik yola 28-30 santimetr qalınlığında beton döşənmiş, yolla kəsişən kommunikasiya xətləri dəyişdirilmiş, suötürücü qurğular, körpü və keçidlərin tikintisi layihə üzrə həyata keçirilmişdir.

Ümumilikdə, 14,1 milyon kubmetr torpaq, 2,1 milyon kubmetr beton işləri görülmüşdür. Burada 20 körpü, 9 heyvan keçidi olacaqdır. Hərəkətin intensivliyindən asılı olaraq yol 2, 3, 4 və 6 zolaqlıdır.

Dövlətimizin başçısı yolun açılışını bildirən lenti kəsdi.

İnşaatçıları salamlayan Prezident İlham ƏLİYEV onları təbrik edərək dedi:

–Yeni yolun istifadəyə verilməsi münasibətilə sizi təbrik edirəm. Gördüyünüz işlərə görə sizə minnətdaram. Bu yol tikintisi hələ Rusiya sərhədinə qədər davam edəcəkdir. Əminəm ki, yaxın zamanlarda biz bu yolun tam istifadəyə verilməsinı qeyd edəcəyik. Sizə yeni uğurlar arzulayıram.

Sağ olun.

Hazırda yolun Dəvəçi şəhəri ərazisindən keçən hissəsində - Dəvəçi çayı üzərində uzunluğu 544 metr, eni 23 metr, hündürlüyü 21 metr olan körpünün tikintisi sürətlə davam etdirilir.

Prezident İlham Əliyev körpüdə aparılan tamamlama işləri ilə də tanış oldu.

Bildirildi ki, Azərbaycanda tikilən 16 aşırımlı bu ən uzun və ən hündür körpünün tikintisi üzrə işlərin əsas hissəsi müvəffəqiyyətlə həyata keçirilmişdir. Körpünün hər bir dayağının altında müvafiq olaraq 22 metr dərinliyində 30 svay vurulmuşdur. Körpünün quraşdırılmasında 33 metr uzunluğunda beton atmalardan istifadə edilmişdir. Körpü 8-9 ballıq antiseysmik sistemlərlə hesablanmışdır. Gələcəkdə baş verə biləcək sel və daşqın sularının tənzimlənməsi üçün burada dəmir-beton istinad divarları sistemi nəzərdə tutulmuşdur.

Prezident İlham Əliyev körpüdə işlərin vaxtında və keyfiyyətlə başa çatdırılması ilə bağlı tapşırıq və tövsiyələrini verdi.

AzərTAc

Azərbaycan.- 2009.- 19 sentyabr.- S. 1.