Yeni Azərbaycan
Partiyasının (YAP) rayon və şəhər təşkilatları
sədrlərinin qarşıdan gələn bələdiyyə
seçkilərinə hazırlıq məsələləri
ilə əlaqədar ümumrespublika müşavirəsi
keçirilmişdir.
Müşavirədə çıxış edən YAP sədrinin
müavini-icra katibi, Milli Məclisin deputatı Əli Əhmədov
bildirmişdir ki, partiya bələdiyyə seçkilərinə
hazırdır. Əli Əhmədov
indiyədək həyata keçirilən tədbirlərin qənaətbəxş
olduğunu qeyd etmişdir.
Ə.Əhmədov
vurğulamışdır ki, seçkidə uğur qazanmaq
iqtidarın həyata keçirdiyi siyasətə ölkə vətəndaşlarının
verdiyi qiymətdən bilavasitə asılıdır. Bu mənada inamla deyə bilərik
ki, qarşıdan gələn bələdiyyə seçkilərində
YAP-ın qələbəsi şəksizdir. Çünki
ölkəmizin Prezidenti, partiyamızın sədri İlham Əliyevin
həyata keçirdiyi siyasət nəticəsində Azərbaycan
böyük uğurlar qazanır. YAP sədrinin müavini nəzərə
çarpdırmışdır ki, Azərbaycan sürətlə
inkişaf edir. Bu inkişaf təkcə statistik rəqəmlərdə
deyil, vətəndaşların həyatının
köklü surətdə dəyişməsində də
özünü göstərir. Son illər həyata
keçirilən siyasət nəticəsində Azərbaycanın
simasi yeniləşmiş, müasirləşmişdir. Ölkəmizin
rəhbərliyinin həyata keçirdiyi siyasət
xalqımız tərəfindən tam dəstəklənir,
dövlətimizin başçısına inamı daha da
gücləndirir.
Azərbaycanda bələdiyyələrin
on ilə yaxın bir müddətdə fəaliyyət
göstərdiyini xatırladan Əli Əhmədov
bildirmişdir ki, ötən dövr ərzində bələdiyyələrin
işinin təkmilləşdirilməsi istiqamətində
ciddi addımlar atılmışdır. O, həmçinin qeyd etmişdir ki,
yerli özünüidarəetmə orqanlarının vəzifəsi
insanlara səmərəli xidmət göstərmək və
yerli sosial məsələlərin həllinə daha peşəkar
yanaşmaqdan ibarətdir. Bələdiyyə seçkilərinin
digər seçkilərdən fərqləndiyini deyən YAP
sədrinin müavini vurğulamışdır ki, bu
seçki kampaniyasında əsas ağırlıq
partiyanın yerli təşkilatlarının üzərinə
düşür.
Hazırda fəaliyyətdə
olan bələdiyyələrin tərkibində
qadınların və gənclərin azlıq təşkil
etdiyini vurğulayan Əli Əhmədovun sözlərinə
görə, hər iki təbəqə cəmiyyətdə
böyük potensiala malikdir. Ona görə də qarşıdan gələn seçkilərdə
qadınların və gənclərin namizədliyinə
üstünlük verilməlidir.
Müşavirədə
seçki qanunvericiliyinə uyğun olaraq, YAP-ın rayon və
şəhər təşkilatlarına müvafiq tövsiyə
və tapşırıqlar verilmişdir.
AzərTAc
Azərbaycan.- 2009.- 20 sentyabr.- S. 2.