Beynəlxalq kinofestival çərçivəsində müsəlman ölkələrinin filmləri nümayiş etdirilir

Bakıda keçirilən bu möhtəşəm kinofestivalda iştirakından məmnun olduğunu bildirən almaniyalı kinoşünas və tənqidçi Hans Yoahim Şleqel Azərbaycanda böyük səmimiyyət və qonaqpərvərliklə qarşılandığını demişdir. Hazırda biz bir-birindən maraqlı filmləri izləyirik. Bu gün dünya kinosunda baş verən mühüm yeniliklər İslam ölkələrinin rejissorları tərəfindən çəkilmiş filmlərdə də özünü göstərir. Bu ekran əsərləri olduqca zəngin süjet xətti ilə diqqəti cəlb edir. Filmlərdə islami dəyərlərin təbliği ilə yanaşı, bəşəriyyəti narahat edən problemlərə də xüsusi yer ayrılmışdır.

Qonaq demişdir ki, 2009-cu ildə Bakının İslam mədəniyyətinin paytaxtı elan olunması ilə festivalın coğrafiyası genişlənmişdir. Çox sevindirici haldır ki, burada İslam ölkələrini təmsil edən gənc və istedadlı rejissorların filmlərini izləməklə yanaşı, həm də onların bəziləri ilə yaxından tanış ola bilirik.

Sonra türkiyəli rejissor Özür Kızıltanın 2006-cı ildə çəkdiyi "Takva" filmi nümayiş etdirilmişdir. İslam dininin hər kəsi saflaşmağa çağıran müqəddəs ehkamlarından, insanı daim bütövlüyə, ülviliyə, saflığa səsləməsindən, xoş amallar naminə birləşən insanların bir-birinə sonsuz sevgisindən bəhs edən bu ekran əsəri iştirakçılar tərəfindən maraqla qarşılanmışdır.

Qeyd edək ki, festival çərçivəsində təşkil olunmuş müsəlman ölkələri filmlərinin panoramasında rejissorlar Elçin Musaoğlunun "Qırxıncı qapı" (Azərbaycan), Rüstəm Abdraşevin "Stalinə hədiyyə" (Qazaxıstan), Rəsul Sədrəməlinin "Hər gecə tənhalıq", Firuzə Xosrovaninin "Manekenlər" (İran), Əyub Şahobiddinovun "Yurta" (Özbəkistan), Filipp Dibinin "İtmiş ruhun axtarışında" (Misir), Nurəddin Laxmarinin "Kasaneqra" (Mərakeş) və Fadhel Cəzirinin "Otuzuncular" (Tunis) ekran əsərlərinin nümayişi nəzərdə tutulmuşdur.

AzərTAc

Azərbaycan.- 2009.- 20 sentyabr.- S. 6.