Son illərdə Azərbaycan
Respublikasında neft-qaz strategiyasının uğurla həyata
keçirilməsi nəticəsində bir sıra
mühüm nailiyyətlər əldə olunmuşdur. Bu əsasən
neft hasilatının sabitləşdirilməsi, təbii və
səmt qazlarının hasilatının kəskin şəkildə
artırılması və bunun hesabına ölkənin enerji
təhlükəsizliyinin təmin edilməsidir.
Hazırda fəaliyyət
göstərən neft-qaz emalı və neft-kimya müəssisələri
hasil olunan karbohidrogen resurslarının emalı hesabına
respublika iqtisadiyyatının tələbatını əsasən
ödəyir.
Lakin son illərdə
neftin emal dərinliyinin xeyli artaraq dünya standartları səviyyəsinə
çatdırılmasına baxmayaraq, təbii və səmt
qazlarının emalı, neft-kimya sənayesi müəssisələrinin
səviyyəsi, neft məhsullarının çeşidləri
və keyfiyyəti dünya standartlarına hələlik cavab
vermir.
Bununla bağlı neft-qaz sənayesində
olan problemlərin həlli üçün karbohidrogen
resurslarının müasir standartlara uyğun kompleks şəkildə
emalının təşkil edilməsi zərurəti
yaranır.
Yuxarıda qeyd edilənləri
nəzərə alaraq, neft-qaz emalı və neft-kimya sahəsinin
gələcək inkişafı yollarının əsas
prioritet istiqamətini müəyyənləşdirmək və
iqtisadi, ekoloji cəhətdən əsaslandırılmış
təkliflər hazırlamaq məqsədi ilə qərara
alıram:
1. Azərbaycan
Respublikasında neft-qaz emalı və neft-kimya sənayesinin
strateji inkişafı barədə təkliflərin
hazırlanması üçün aşağıdakı tərkibdə
Komissiya təsdiq edilsin:
Komissiyanın sədri:
Yaqub Eyyubov - Azərbaycan
Respublikası Baş nazirinin birinci müavini
Komissiyanın üzvləri:
Şahin Mustafayev -Azərbaycan
Respublikasının iqtisadi inkişaf naziri
Samir Şərifov -Azərbaycan
Respublikasının maliyyə naziri
Natiq Əliyev -Azərbaycan
Respublikasının sənaye və energetika naziri
Hüseynqulu
Bağırov -Azərbaycan Respublikasının ekologiya və
təbii sərvətlər naziri
Kərəm Həsənov
-Azərbaycan Respublikasının Əmlak Məsələləri
Dövlət Komitəsinin sədri
Mahmud Kərimov -Azərbaycan
Milli Elmlər Akademiyasının prezidenti
Rövnəq Abdullayev
-Azərbaycan Respublikasının Dövlət Neft Şirkətinin
prezidenti
Məcid Kərimov -Azərbaycan
Respublikasının "Azərikimya" Dövlət
Şirkətinin prezidenti
Rasim Dadaşov -Azərbaycan
Respublikasının Nazirlər Kabineti Aparatının neft və
kimya şöbəsinin müdiri
2. Komissiya üç ay
müddətində təkliflərini hazırlayıb Azərbaycan
Respublikasının Prezidentinə təqdim etsin.
İlham ƏLİYEV,
Azərbaycan Respublikasının Prezidenti
Bakı şəhəri, 23 sentyabr 2009-cu il
Azərbaycan.- 2009.- 24 sentyabr.- S. 1.