Sentyabrın 23-də
Çexiya Respublikası Parlamenti Senatının sədri Prşemısl
Sobotkanın başçılıq etdiyi nümayəndə
heyəti Azərbaycana səfərə gəlmişdir.
Heydər Əliyev
adına Beynəlxalq Hava Limanında qonağı Milli Məclis
Sədrinin birinci müavini Ziyafət Əsgərov və digər
rəsmi şəxslər qarşılamışlar.
Prşemısl Sobotka
hava limanında jurnalistlərə bildirmişdir ki, səfərin
məqsədi ölkələrimiz arasında mövcud olan
siyasi və iqtisadi münasibətləri, eləcə də
parlamentlərarası əlaqələri daha da genişləndirmək
və dərinləşdirməkdir. Olduqca maraqlı və zəngin
səfər proqramı olduğunu vurğulayan qonaq səfər
çərçivəsində çoxlu görüşlər
keçirəcəyini bildirmişdir.
Çexiya
Senatının sədri qeyd etmişdir ki, onun ölkəsi Azərbaycan
ilə münasibətlərin strateji tərəfdaşlıq
səviyyəsinə çatmasına xüsusi önəm
verir. Çexiyanın Avropa İttifaqına sədrliyi dövründə
"Şərq tərəfdaşlığı"
proqramı çərçivəsində bu məsələyə
böyük diqqət yetirirdik. Biz yenə də məsələyə
həssaslıqla yanaşırıq və istəyirik ki, bu məsələdə
daha da irəli gedək.
Səfər çərçivəsində
Çexiya Senatının sədri Milli Məclisdə, Nazirlər
Kabinetində bir sıra görüşlər keçirəcək,
Heydər Əliyev Fondunda və Bakı Slavyan Universitetində
olacaq, Azərbaycan-Çexiya biznes forumunun
açılışında iştirak edəcəkdir.
Prşemısl Sobotka Fəxri
xiyabanda ümummilli lider Heydər Əliyevin məzarını
və Şəhidlər xiyabanını ziyarət edəcəkdir.
AzərTAc
Azərbaycan.- 2009.- 24
sentyabr.- S. 3.