Bakının Babək prospektində yeni yol qovşağının açılışı olmuşdur

Sentyabrın 24-də Bakının Babək prospekti ilə Məhəmməd Hadi və Mikayıl Əliyev küçələrinin kəsişməsində tikilmiş yeni yol qovşağı kompleksinin açılışı olmuşdur.

Azərbaycan Prezidenti İlham Əliyev mərasimdə iştirak etmişdir.

Dövlətimizin başçısını inşaatçılar hərarətlə qarşıladılar.

Nəqliyyat naziri Ziya Məmmədov Prezident İlham Əliyevə məlumat verdi ki, kompleks iki yolötürücüdən, hər biri beşaşırımlı iki körpüdən, üç avtomobil və iki piyada keçidindən ibarətdir.

Tikinti işlərini Nəqliyyat Nazirliyinin "Azəryolservis" ASC-nin sifarişi ilə bu sahədə ixtisaslaşmış, müasir standartlara uyğun çoxsaylı körpü və yol keçidləri ilə yanaşı, yüzlərlə kilometr yollar çəkmiş qabaqcıl müəssisələrdən biri olan "Gəncə Körpü Tikinti-2" Açıq Səhmdar Cəmiyyəti həyata keçirmişdir. Kompleksin layihəsi "Texnomost" şirkəti tərəfindən hazırlanmışdır.

Prezident İlham Əliyev paytaxtın Nizami və Xətai rayonlarının qovuşduğu ərazidə yerləşən kompleksin sxemi ilə tanış oldu, tikintinin gedişini əks etdirən fotoşəkillərə baxdı. Qeyd olundu ki, bir-birini tamamlayan iki yolötürücüsünün yaratdığı bu kompleks mürəkkəbliyi və müasirliyi ilə digərlərindən fərqlənir və hərəkətin son dərəcə sıx olduğu bu ərazidə tıxacların aradan qaldırılmasında və piyadaların təhlükəsizliyində mühüm rol oynayacaqdır.

İnşasına 2006-cı ildə başlanmış yol qovşağının ümumi uzunluğu 2116 metr, giriş və çıxışla birlikdə isə 2500 metrdən artıqdır. Eni 23,4 metr olan yol kompleksinin iki enmə və iki qalxma zolağı vardır.

Kompleksə daxil olan körpülərin aşırım hissələri xüsusi texnologiya ilə gərginləşdirilmişdir. Gərginləşmə işləri və temperatur tikişlərinin inşası Fransanın "Freysaj" şirkəti tərəfindən aparılmışdır.

Metronun "Xalqlar dostluğu" stansiyası dairəsindəki körpünün aşırım hissəsinin uzunluğu 129 metrdir, digər körpünün aşırım hissəsi isə 196 metrdir. Hərəkət hissəsi 23,4 metr olan körpülərin eni enmə və qalxma zolaqlarında 37,6 metrə qədər dəyişir. Yanaşma yollarının uzunluğu 2640 metr, istinad divarlarının ümumi uzunluğu 4320 metrdir. Yan yollardan körpülərə qalxmaq və enmək üçün 4 rampa inşa olunmuşdur. İstinad divarları arasında yol örtüyünün qalınlığı 22 santimetrdir ki, bu da kompleksin istismar müddətini artırır. Ümumiyyətlə, yol qovşağının tikintisində 350 min kubmetrdən çox torpaq işləri görülmüş, 155 min kvadratmetr əraziyə asfalt döşənmiş, 57 min ton asfalt-beton yayılmış, 22 kilometr uzunluqda səki daşları quraşdırılmışdır. Bundan əlavə, inşaat işləri zamanı 60 min kubmetrdən çox betondan, 7 min tondan çox poladdan istifadə olunmuşdur.

Qovşağın tərtibatı da gözoxşayandır, körpülər üzərində milli ornamentlərlə işlənmiş 2770 metr çuqun məhəccər quraşdırılmışdır. Zövqlə işlənmiş 88 ədəd işıq dirəyindən asılmış lampalar gecələr yol qovşağını işıqlandırmaqla yanaşı, bu əraziyə xüsusi yaraşıq verir. İşıqlandırma sistemində əsas yenilik ondan ibarətdir ki, qaranlıq düşdükcə lampalar avtomatik olaraq yanmağa başlayır, günəş çıxarkən sönür. İstinad divarlarının, keçidlərin ağlay daşları ilə milli memarlıq ənənələrinə uyğun naxışlarla bəzədilməsi, korpülərin dayaqlarında qranit materialdan istifadə olunması qovşağın gözəlliyini daha da artırmışdır.

Bütün bunlarla yanaşı, tikinti işləri zamanı inşaat materiallarının keyfiyyətinə xüsusi fikir verilmiş, onlar müasir laboratoriyalarda təcrübəli mütəxəssislər tərəfindən yoxlanılmışdır. Avtomobil keçidlərinin tikintisində istifadə olunan 18 metr uzunluqlu trapesiya şəkilli aşırım tirləri, tağvari piyada keçidləri "Gəncə Körpü Tikinti-2" ASC-nin istehsalat bazasında hazırlanmışdır.

Ümumiyyətlə, yol qovşağının estetik görünüşünə xüsusi diqqət yetirilmişdir. Belə ki, 35 min kvadratmetr ərazidə çəmənlik salınmış, müxtəlif ağac və kollar əkilmişdir. Bunlar ətrafda gözəllik yaratmaqla bərabər, ekoloji tarazlığa da müsbət təsir göstərir.

Körpülərdə yağış sularının yığılıb qalmaması üçün xüsusi kollektor, yan yollarda isə kanalizasiya xətləri tikilmişdir.

Prezident İlham Əliyevə məlumat verildi ki, tikinti işlərinin intensiv dövründə burada 350 nəfər çalışmışdır.

Yol qovşağı metronun "20 Yanvar" stansiyasındakı dairə, "Günəşli" yaşayış sahəsi və Bakıxanov qəsəbəsi, Böyük Şor qovşağı, Azadlıq meydanı, Heydər Əliyev adına Beynəlxalq hava limanı və digər istiqamətlərdə nəqliyyatın rahat gediş-gəlişinə imkan verəcəkdir.

Yol qovşağının maketi dövlətimizin başçısına hədiyyə olundu.

Prezident İlham Əliyev yeni yolötürücüsünün açılışını bildirən lenti kəsdi, nəqliyyatçıları və inşaatçıları bu münasibətlə təbrik edərək dedi:

- Təbrik edirəm, yeni gözəl körpü tikilib istifadəyə verilmişdir. Bakı gözəlləşir, abadlaşır. Körpü bu bölgədə tıxacların aradan qaldırılması üçün çox gözəl bir infrastruktur layihəsidir. Bu körpünün tikintisi onu göstərir ki, yerli şirkətlər artıq beynəlxalq təcrübəyə malikdirlər. Yerli şirkətlər tərəfindən həyata keçirilən bütün gözəl infrastruktur layihələri məni çox sevindirir.

Çünki əvvəllər xaricdən şirkətlər dəvət olunurdu, təcrübəmiz yox idi. Hətta bəzi hallarda işçi qüvvəsi də xaricdən gətirilirdi. İndi isə bu layihələri Azərbaycan dövlətinin vəsaiti hesabına yerli şirkətlər icra edir. Bu layihələri Azərbaycan fəhlələri, mütəxəssisləri gerçəkləşdirirlər. Bu, Azərbaycanın inkişafını göstərir, onu göstərir ki, biz istənilən layihəni uğurla icra edə bilərik.

Bakıda son illər ərzində tikilən körpülər, yol qovşaqları, bütün yol infrastrukturu həm gözəllik, həm keyfiyyət, həm də funksional baxımdan ən yüksək səviyyədədir. Buna görə bütün bu işlərdə iştirak edən insanlara öz təşəkkürümü bildirmək istəyirəm. Nəqliyyat Nazirliyi, müxtəlif yerli şirkətlər bu gözəl işləri birlikdə görürlər, şəhərimizi gözəlləşdirirlər. Bir daha sizi təbrik edirəm və yeni uğurlar arzulayıram.

Açılış mərasimindən sonra yeni yol qovşağında nəqliyyatın hərəkəti başlandı.

AzərTAc

Azərbaycan.- 2009.- 25 sentyabr.- S. 2.