Azərbaycanın Baş naziri Çexiya Senatının sədri ilə görüşmüşdür

Sentyabrın 24-də Azərbaycanın Baş naziri Artur Rasizadə ölkəmizdə səfərdə olan Çexiya Senatının sədri Prşemısl Sobotka ilə görüşmüşdür.

Azərbaycan hökumətinin başçısı son vaxtlar bütün sahələrdə dinamik inkişaf etməkdə olan Azərbaycan-Çexiya əlaqələrindən söhbət açaraq qeyd etmişdir ki, ölkələrimizin müxtəlif qurumlarını təmsil edən nümayəndə heyətlərinin qarşılıqlı səfərləri bu məsələdə böyük rol oynayır. Baş nazir Çexiyanın bank strukturlarının Azərbaycanda həyata keçirilən layihələrin maliyyələşdirilməsində fəal iştirak etməsini vurğulayaraq ümid etdiyini bildirmişdir ki, bu gün keçirilmiş Azərbaycan-Çexiya biznes forumu qarşılıqlı faydalı iqtisadi əməkdaşlığın genişləndirilməsi üçün daha bir stimul olacaqdır.

Artur Rasizadə Çexiya nümayəndə heyətinin üzvlərinə qlobal maliyyə böhranı şəraitində uğurla inkişaf edən Azərbaycan iqtisadiyyatı haqqında məlumat vermişdir. O, Azərbaycanın əsas problemi - Ermənistan-Azərbaycan, Dağlıq Qarabağ münaqişəsi haqqında da danışmışdır.

Çexiya Senatının sədri Prşemısl Sobotka səfəri çərçivəsində aparılmış danışıqlardan məmnun qaldığını bildirərək Çexiya ilə Azərbaycan arasında iqtisadi əlaqələrin dərinləşməsi üçün böyük potensialın olduğunu qeyd etmişdir. Qonaq demişdir ki, sentyabrın 24-də keçirilmiş biznes forumun gedişində iki ölkənin işgüzar dairələri arasında yaranmış əlaqələr gələcək layihələrin möhkəm təməli olacaqdır.

AzərTAc

Azərbaycan.- 2009.- 25 sentyabr.- S. 2.