Kinofestival başa çatdı

 

Bu il Bakının İslam mədəniyyətinin paytaxtı elan olunması ilə bağlı respublikamızda keçirilən tədbirlər sırasında XI "Şərq-Qərb" Bakı Beynəlxalq kinofestivalı artıq başa çatdı.

Bu festivalın təntənəli açılış mərasimində TÜRKSOY-un baş direktoru Düşen Haseinov həmin günü bütün türk dünyasının bayramına çevrildiyini dilə gətirərək bu addımın türkdilli xalqların birliyinə, vahid amallar, ideyalar naminə bütövləşməsinə xidmət göstərdiyini söylədi. Sonra festivalın rəhbəri Azərbaycan Kinematoqrafçılar İttifaqının sədri, xalq yazıçısı Rüstəm İbrahimbəyova Koroğlunun yeni büstünü hədiyyə etdi.

Qeyd edək ki, Beynəlxalq festival çərçivəsində Azərbaycana dünyanın bir çox ölkələrindən tanınmış sənət adamları - çex kinematoqrafı, Oskar mükafatçısı, ssenarist və professor Yan Sverak, almaniyalı kinoşünas və tənqidçi Hans Yoahim Şleqel, türkiyəli rejissor Özür Kızıltan və digərləri də dəvət olunmuşdular.

Festival çərçivəsində müsəlman ölkələri ilə yanaşı Rusiya, İran, Almaniya, Estoniya, Bolqarıstan, Türkiyə, Hollandiya, Belçika, Polşa, İspaniya və Fransadan olan kinematoqrafçılar öz filmlərini nümayiş etdirdilər. Tədbir iştirakçıları son iki ildə MDB və Baltikyanı ölkələrdə istehsal edilən və müxtəlif festivallarda uğur qazanan filmlərlə də tanış olublar.

Ənənəvi olaraq yekunda "Tamaşaçılara ən humanist çağırış", "Dünya kinematoqrafındakı xidmətlərinə görə", "Ən parlaq debüt" və digər nominasiyalar üzrə mükafatlar təqdim edildi.

 

 

Zəkurə QULİYEVA

 

Azərbaycan.- 2009.- 25 sentyabr.- S. 7.