Türkiyə Böyük Millət Məclisi Azərbaycanın milli maraqlarına xələl gətirə biləcək heç bir qərar qəbul etməyəcəkdir

Azərbaycanda səfərdə olan Türkiyə Böyük Millət Məclisinin (TBMM) sədri Məhmət Əli Şahin sentyabrın 26-da Milli Məclisə gəldi. Parlamentin binası önündə qonağı Milli Məclisin Sədri Oqtay Əsədov və digər rəsmi şəxslər qarşıladılar. Qonaq Milli Məclisin iclas zalı, parlamentin yeni tikilmiş korpusu ilə tanış oldu, deputatlar üçün yaradılmış iş şəraitini yüksək qiymətləndirdi.

Parlamentdəki Heydər Əliyev Xatirə zalı ilə tanış olan Məhmət Əli Şahin xatirə kitabına ürək sözlərini yazdı.

Milli Məclisin Sədri Oqtay Əsədovla Məhmət Əli Şahin arasında təkbətək görüş keçirildi. Sonra görüş geniş tərkibdə davam etdirildi. Qonaqları Milli Məclisdə salamlamaqdan məmnunluq duyduğunu bildirən spiker Oqtay Əsədov dedi ki, bir millət iki dövlət olan Azərbaycanla Türkiyə arasındakı dostluq və qardaşlıq münasibətləri günbəgün möhkəmlənir, inkişaf edir. Bunu ən yüksək səviyyələrdə nümayəndə heyətlərimizin səfərləri də sübut edir.

Milli Məclisin Sədri qeyd etdi ki, Azərbaycanla Türkiyəni bir-birilə bağlayan çox sıx tellər var. Ən vacibi isə odur ki, bizim damarlarımızdan eyni qan axır. Lakin zaman-zaman bəzi qüvvələr, xüsusən də ermənilər bu münasibətlərə xələl gətirməyə çalışır, mətbuatda yanlış məlumatlar yayırlar. Amma biz inanırıq ki, qardaş Türkiyə Azərbaycanın milli maraqlarına zidd addımlar atmayacaq.

Səmimi görüşə və qonaqpərvərliyə görə təşəkürünü ifadə edən Məhmət Əli Şahin dedi ki, TBMM-nə sədr seçildikdən sonra Şimali Kipr istisna olmaqla ilk xarici səfərini məhz Azərbaycana edir. Azərbaycanı öz vətəni hesab etdiyini deyən qonaq əlavə etdi ki, bizi bir-birimizə bağlayan çox mənəvi dəyərlərimiz var. Biz eyni kökdən gəlirik.

Məhmət Əli Şahin onu da bildirdi ki, dövlət başçıları və digər rəsmi şəxslər səviyyəsində qarşılıqlı səfərlərin intensivliyi də əlaqələrin inkişafına əyani sübutdur.

Qonaq daha sonra bildirdi ki, onun ölkəsi Türkiyə-Azərbaycan dostluğuna zidd heç bir addım atmayacaq, TBMM qardaşlığımıza xələl gətirə biləcək qərar qəbul etməyəcəkdir.

Məhmət Əli Şahin Türkdilli Ölkələrin Parlament Assambleyasının yaradılmasında Azərbaycanın səylərini yüksək qiymətləndirdi, bu təşkilatın türkdilli dövlətlərin birliyinin möhkəmlənməsində öz töhfəsini verəcəyini dedi.

Sonra görüşdə qarşılıqlı əlaqələrin daha da genişləndirilməsi, birgə əməkdaşlıq və digər məsələlər ətrafında geniş fikir mübadiləsi aparıldı.

Azərbaycan.- 2009.- 27 sentyabr.- S. 2.