Moskvada nəşr olunan
siyasət, iqtisadiyyat, sosiologiya və hüquq problemləri
haqqında elmi jurnal - "Federasiya" jurnalı 2009-cu il birləşmiş
6-7-ci nömrəsində jurnalist, siyasi elmlər namizədi
Tahir Məmmədovun "İki əsrin
qovuşuğunda" ("Na rubeje dvux epox") adlı məqaləsi
çap edilmişdir.
Məqalədə XX əsrin
90-cı illərindən - Azərbaycan xalqı
üçün ağır sınaqlarla zəngin dövrdən,
İttifaq rəhbərliyinin respublikalarda demokratik hərəkata
divan tutmasından, bu dövrdə Heydər Əliyevin
nümayiş etdirdiyi sərt, ciddi, prinsipial, qətiyyətli
mövqedən, həmin mövqeyi cəmiyyətə çatdırmaq
üçün mətbuatla ünsiyyətindən söz
açılır. Müəllif müdrik siyasi xadimin yeni
ittifaq müqaviləsinə qarşı müqavimətini yada
salır, onun "Sovetskaya Qruziya" qəzetinin 1989-cu il 25
fevral tarixli nömrəsindəki müsahibəsindən misal
gətirir. Yazıda M.Qorbaçovun Heydər Əliyevə
qarşı tutduğu qərəzli mövqe, Dağlıq
Qarabağ məsələsi ilə bağlı siyasi
simasızlığı təhlil olunur. Xatırladılır
ki, belə ağır, çətin vaxtda xalqı ilə bir
yerdə olmağı hər şeydən üstün tutan
böyük azərbaycanlı çəkinmədən
M.Qorbaçovun apardığı ikiüzlü siyasətin
iç üzünü açıb göstərir,
tutduğu yüksək postdan - SSRİ Nazirlər Soveti Sədrinin
birinci müavini və Sov.İKP MK Siyasi Bürosunun
üzvlüyündən uzaqlaşdırılsa da, Azərbaycana
və azərbaycanlılara qarşı hazırlanan təhlükəni
zərərsizləşdirmək üçün əlindən
gələni əsirgəmir.
Məqalə müəllifi
Azərbaycan xalqının cəsarətli oğlu Heydər Əliyevi
xalqının milli maraqları mövqeyində həmişə
mərd, mətin dayandığını, xalqı, vətəni
yolunda ölümdən belə çəkinmədən, mənəvi
terrora, hədə-qorxuya baxmadan öz sözünü mərd-mərdanə
dediyini yazır. Göstərir ki, o, "perestroyka"nın
dağıdıcı ünsürlərini çəkinmədən
tənqid edirdi. Moskvada işsiz, xəstə, dörd tərəfdən
təqiblərə məruz qalanda burada nəşr olunan bir
jurnalda sovet hökumətinin Dağlıq Qarabağ məsələsində
azərbaycanlıların ziyanına tərəfkeşlik etməsini
cəsarətlə tənqid edir, öz xalqını bu məsələdə
ayıq-sayıq, həm də qorxmaz və mübariz olmağa
çağırır.
Müəllif oxuculara
Heydər Əliyevin bütün dövrlərdə tarixi
şəxsiyyət olduğunu, həmişə, hər zaman
öz cəsarətli sözünü çəkinmədən,
qorxmadan dediyini, ən əsası isə, daim xalqına gərəkli,
lazımlı bir siyasi lider olduğunu faktlar və
sübutlarla çatdırır. Bu zaman o, ümummilli liderin
1989-1990-cı illərdə müsahibələrinin dərc
olunduğu "Ana torpaq", "Sovetskaya Qruziya",
"Şərq qapısı", "Şərq",
"Kommunist", "Bakinski raboçi", "Pravda" qəzetlərindən,
"Teatralnaya jizn" jurnalından sitatlar gətirir.
AzərTAc
Azərbaycan.- 2009.- 27 sentyabr.- S. 2.