Bülbül Fondunda
"İstiqlal" ordenli, xalq artisti Polad
Bülbüloğlunun "Oxuyardı BülbülE Oxuyur Polad
Bülbüloğlu" adlı CD-nin təqdimat mərasimi
keçirildi. Rafiq Babayev adına səsyazma studiyasında
hazırlanmış yeni CD-də mahnıları aranjiman edən
bəstəkar Siyavuş Kərimidir. Yeni layihədə musiqi
həvəskarlarına Azərbaycan xalq mahnıları təqdim
olunub.
Polad
Bülbüloğlu bildirdi ki, onun
yaradıcılığında musiqinin bir çox janrına
aid örnəklər - ciddi simfonik əsərlər, baletlər,
mahnılar, instrumental melodiyalar yer alıb. Lakin buna baxmayaraq
vaxtilə ölməz Bülbülün böyük
şövqlə oxuduğu Azərbaycan xalq
mahnılarını, el havalarını yeni musiqi çələngində
bir araya toplayaraq pərəstişkarlara təqdim etməyin zərurətini
duyub. Yeni aranjimanda təqdim olunan mahnılardan bir neçəsini
də canlı ifa edən Polad Bülbüloğlu söylədi:
"Əlbəttə, nə mənim səsim
Bülbülün avazı kimi məlahətlidir, nə də
elə geniş vokal imkanlarım var. Sadəcə olaraq,
doğma ellərə bəslədiyim sevgimi, ata yurduna olan
müqəddəs duyğularımı əks etdirmək
üçün qəlbimi titrədən o unudulmaz vətən
nəğmələrinə müraciət etdim. Həm də
bu mənim övladlıq borcumdur".
Xalq artisti Arif Babayev həm
Polad Bülbüloğlunu, həm də məclis
iştirakçılarını təbrik edərək dedi:
"Polad böyük Bülbülün oğludur, onun mənəvi
varisidir, o oxuduqca mən həyəcanlanırdım. Bir Allah
bilirdi ki, xəyalım hara qanadlanırdı. Arzulayıram ki,
Bülbülün ruhu dolaşan doğma Qarabağda bir daha bu
nəğmələri eşidək".
Milli Konservatoriyanın
rektoru Siyavuş Kərimi, Moskvada yaşayan həmyerlimiz Rafik
Rəhimov və başqaları yeni CD ilə bağlı
öz fikirlərini söylədilər. Yeri gəlmişkən,
"Palmali" şirkətlər qrupunun sponsorluğu ilə
işıq üzü görən disk satış
üçün deyil, dostlara hədiyyədir.
Yüksək səviyyədə
hazırlanmış "Oxuyardı Bülbül...EOxuyur Polad
Bülbüloğlu" adlı CD-nin içində Polad
Bülbüloğlunun yaradıcılığını əks
etdirən açıqcanın olması da bəstəkarın
musiqi fəaliyyəti haqqında ətraflı bilgi vermək
baxımından dəyərlidir. Burada Azərbaycan mədəniyyətinə
uzun illər xidmət edən Polad Bülbüloğlunun
yaradıcılığına güzgü tutulur. Bu
güzgünün ilk görüntüsündə "Gəl,
ey səhər" deyib işıqlı sabahlar arzulayan
yaraşıqlı, şux bir gəncin pərdə-pərdə
ucalan harayı eşidilir. Sonda isə saçları bəyazlaşmış
musiqi xadiminin Xarı bülbüllə bağlı dilləri
dolaşan həqiqət libaslı bir əfsanənin ibrətamiz
mənaları açılır. Dünyanın heç
harasında göyərməyən bu çiçəyə
Şuşadan ayrı həyat yoxdur. Mənalı sonluqdur.
Dünyalarca məşhurlaşsaq, zirvələrə ucalsaq
belə ruhumuzun ünvanı Vətən, doğma yurd bizi
özünə çəkməkdədir.
O gün axşam
Bülbül Fonduna toplaşanlar həqiqətən xoş bir
təəssürat yaşadılar. Həm yeni ifaya qulaq
asdılar, həm evlərinə sovqat apardılar (CD nəzərdə
tutulur), həm də bir xiffətli arzunun gerçəkləşməsinə
inandılar. Nə vaxtsa belə bir gün də
mütləq Şuşada
olacaq.
F.XƏLİLZADƏ
Azərbaycan.- 2009.- 29 sentyabr.- S. 7.