Almaniya Azərbaycanlıları Koordinasiya Mərkəzi Avropadakı soydaşlarımızı birləşdirməyi qarşısına məqsəd qoyub

 

Almaniyada yaşayan soydaşlarımızın sayı və təşkilatlanmaları digər Avropa dövlətlərindən fərqlənir. Bir neçə il əvvəl pərakəndə halda fəaliyyət göstərən onlarla icma və birlik vahid mərkəzdən idarə olunmaq qərarına gəliblər. Almaniya Azərbaycanlılarının Koordinasiya Mərkəzinin icraçı direktoru Samirə İsmayılova əməkdaşımızla söhbətində yeni yaradılan qurumun fəaliyyətindən, son iki ildə əldə etdiyi nailiyyətlərdən danışdı:

- Almaniya dünya siyasətinə həlledici təsir gücünə malik dövlət olduğundan buradakı həmvətənlərimizin mütəşəkkil fəaliyyət göstərməsi zəruri idi. Səyyar fəaliyyətlə diasporun ciddi uğurlara nail olması qeyri-mümkündür. Həmin səbəbdən də soydaşlarımızla bir araya gələrək Almaniya Azərbaycanlılarının Koordinasiya Mərkəzini yaratdıq. Təşkilat yeni yaradılmış birliklərdəndir və aktiv fəaliyyət göstərir. Federativ respublika başqa dövlətlərdən fərqli olaraq həmvətənlərimizin son vaxtlar təsis etdikləri birlik və icmaların sayına, eyni zamanda təşkilatlarımızın fəaliyyət imkanlarına görə də seçilir. Hazırda Almaniyada Azərbaycanın 40-a yaxın cəmiyyət və icması fəaliyyət göstərir. Həmin birliklərin fəaliyyətlərini əlaqələndirmək Koordinasiya Mərkəzinin başlıca vəzifəsidir. Təşkilatımızın işi Almaniya üzrə cəmiyyətlərin sədrlərindən ibarət Koordinasiya Şurasının fəaliyyət mexanizminə əsaslanır. Mərkəz yalnız Almaniyada deyil, həm də Avropadakı bütün soydaşlarımızın ünsiyyət nöqtəsinə çevrilməyi qarşısına məqsəd qoyub. Bunun üçün əsas vəzifə soydaşlarımızı lazımınca məlumatlandırmaqdır.

- Siz fəaliyyətinizi hansı istiqamətdə qurmusunuz?

- Azərbaycan elə bir qəribə taleyə malik ölkədir ki, xalqımız əsrlərlə işğal altında yaşadığından tariximizin bəzi dövrlərini başqaları qələmə alıb. Biz buna aydınlıq gətirməli, eyni zamanda diasporumuzun fəaliyyət istiqamətlərini ona uyğun düzgün müəyyənləşdirməliyik. Hazırda çalışırıq ki, ayrı-ayrı mərhələlərə dair faktları dünya birliyinə çatdıraq. Beynəlxalq aləm Azərbaycan həqiqətləri, Dağlıq Qarabağ problemi haqda kifayət qədər dolğun məlumatlandırılmalıdır. Bu məsələdə diaspor təşkilatları kimi bizim üzərimizə mühüm və məsul vəzifələr düşür. Koordinasiya Mərkəzi təsis edildikdən sonra bir sıra istiqamətlərdə uğurlar qazanmışıq. Almaniya ərazisinə görə böyük dövlət olsa da, ayrı-ayrı bölgələrdəki Azərbaycan icmalarının fəaliyyətlərini koordinasiya edə bilmişik. Mütəmadi görüşlər, sıx ünsiyyət, müştərək tədbirlərin təşkili, türkdilli dövlətlərin birlik və icmaları ilə əlaqələrin genişləndirilməsi diasporumuzun güclənməsi üçün mühüm töhfə oldu. Artıq bir sıra çətinliklərimizi aradan qaldırmışıq.

- Dünya Azərbaycanlılarını Əlaqələndirmə Şurasının Bakıda keçirilmiş toplantısı diaspor təşkilatlarımıza daim artan qayğının təcəssümüdür. Siz birlik və icmaların koordinasiyalı fəaliyyətlərinin gücləndirilməsi istiqamətində hansı təşəbbüslə çıxış etmisiniz?

- Diasporumuzun mütəşəkkilliyinin güclənməsi üçün artıq bir neçə tədbir keçirmişik. Koordinasiya Şurası dekabrın 13-də Dünya Azərbaycanlılarının Həmrəyliyi Günü münasibətilə toplantısını keçirdi. İclasda birlik və icmalarımızın hazırkı fəaliyyət mexanizmləri, görüləcək işlər mövzusunda müzakirələr apardıq. Yeni il üçün planlar qurduq. Fəaliyyətimizi həm də mədəniyyət, incəsənət sahələri üzrə təbliğatın genişləndirilməsinə yönəltmişik. Dahi bəstəkarımız Qara Qarayevin 90 illiyi münasibətilə keçirilən tədbirlər, Münhendə Höte İnstitutu, Bavariya radiosu ilə birlikdə "Mədəniyyətlərin dialoqu" mövzusunda təşkil olunmuş konfrans bu qəbildəndir. Bu ilin əvvəllərində də bir sıra tədbirlərin təşkil edilməsini planlaşdırırıq. Diasporumuzun püxtələşməsi dövrü yeni mərhələ və keyfiyyət tələb etdiyindən proqramlarımız ancaq mənsubiyyətimizi, azərbaycançılığı qorumağa yönəldilmiş layihələrdən ibarət deyil. Diaspor olaraq yaşadığımız ölkədə yerli təşkilatlarla, təhsil, mədəniyyət, incəsənət müəssisələri, habelə Almaniyanın intellektual elmi qurumları ilə əlaqələri genişləndirmişik. Bu da təsadüfi deyil. Diaspor tariximizin əsası ümummilli lider Heydər Əliyevin dünya ölkələrində yaşayan bütün soydaşlarımıza diqqət və qayğısı ilə qoyuldu. Bu, bizim üçün böyük xoşbəxtlik idi. Ona görə ki tarixdə ilk dəfə olaraq Azərbaycan dövləti məhz ulu öndərin rəhbərliyi altında həmvətənlərimizə diqqət göstərməyə başladı.

Prezident İlham Əliyev Dünya Azərbaycanlılarının II Qurultayında bu müdrik siyasəti bir daha gücləndirdi və onu inkişaf etdirdi. Biz dünyanın hər yerində ulu öndərimiz tərəfindən əsası qoyulan və Prezident İlham Əliyevin rəhbəriyi ilə davam etdirilən müdrik siyasətin qayğısını görürük. Dövlət başçısı cənab İlham Əliyevin 2007-ci ildə Konrad Adenauer Fondunda keçirilmiş böyük konfransdakı çıxışından sonra Almaniyadakı həmvətənlərimiz qüvvələrini səfərbər etdilər. Hətta tərəddüd keçirən soydaşlarımız da Prezidentimizin fikirlərindən sonra birliyimiz naminə səylə çalışmağa başladılar.

- "Dünya Azərbaycanlılarının Həmrəylik Xartiyası" layihəsinin qəbul edilməsi ilə əlaqədar növbəti mərhələdə qarşınızda hansı vəzifələr durur?

- Xartiya diasporumuzun qarşısında duran əsas vəzifələri özündə əks etdirir. Eyni zamanda fəaliyyətimizdə istina edəcəyimiz konsepsiya, tarixi vətən qarşısında borcumuz və bundan irəli gələn vəzifələr, soydaşlarımızın yaşadıqları dövlətlərin cəmiyyətlərinə inteqrasiyası istiqamətlərini müəyyənləşdirdi. Eyni zamanda Ermənistan-Azərbaycan, Dağlıq Qarabağ münaqişəsi, bədnam qonşularımızın xalqımıza qarşı terror və soyqırım aktları ilə bağlı üzərimizə düşən vətəndaşlıq borcunun nə qədər məsuliyyətli olduğunu bir daha aydınlaşdırdı. Sənəddə uzun illər həyata keçirilməsini arzuladığımız bir sıra məsələləri də önə çəkilib, azərbaycançılıq anlayışının əhəmiyyətinə toxunulub. Yeni mərhələdə diaspor təşkilatları olaraq qarşımızda qoyulmuş tapşırıqlar növbəti dövr üçün həlli vacib olan aktual vəzifələrdir.

 

 

Müsahibəni apardı:

Anar RASİMOĞLU

 

Azərbaycan.-2009.-1 yanvar.-S.5.