Bölgələrdə referendum üzrə təşəbbüs qrupları yaradılır

AzərTAc xəbər verir ki, Binəqədi rayonunda martın 18-də Konstitusiyaya ediləcək əlavələr və dəyişikliklərlə bağlı ölkədə keçiriləcək referendumla bağlı təşəbbüs qrupu yaradılmışdır.

Bu məqsədlə keçirilən toplantıda bildirilmişdir ki, Konstitusiyaya əlavələr və dəyişikliklər edilməsinə dair ümumxalq səsverməsinin keçirilməsi barədə qərar mühüm əhəmiyyət kəsb edir. Bu dəyişikliklər son illər ölkəmizdə demokratik proseslərin və vətəndaş cəmiyyətinin inkişafında əldə olunan nailiyyətlərlə bağlıdır, xalqın sosial tələbi, irəliyə doğru addımdır.

Çıxış edənlər təşəbbüs qrupunun maarifləndirmə, izahat və təbliğat işlərinin aparılmasında vacib rol oynayacağını bildirmişlər.

Səsvermə keçirilmiş və nümayəndələr seçilmişdir. Qrupun "Tərəqqi" adlandırılması qərara alınmışdır.

* * *

Samux rayonunun Sərkar kəndində martın 18-də keçiriləcək referendumla bağlı toplantı keçirilmişdir.

Çıxış edənlər bildirmişlər ki, ötən il dekabrın 26-da Milli Məclisin qəbul etdiyi "Azərbaycan Respublikasının Konstitusiyasına əlavələr və dəyişikliklər edilməsinə dair ümumxalq səsverməsinin (referendumun) keçirilməsi haqqında" qərar müstəqillik yolunda qətiyyətli addımlar atan və demokratik prinsiplər əsasında inkişaf edən Azərbaycanda Konstitusiyanın təkmilləşdirilməsi və uzunömürlü olması deməkdir.

Toplantı iştirakçıları Konstitusiyaya ediləcək dəyişikliklərin seçicilərə çatdırılması və bununla əlaqədar izahat işi aparılması məqsədi ilə "Abad kənd" təşəbbüs qrupu yaratmış və kənd sakinlərini onların təşəbbüsünə qoşulmağa çağırmışlar.

Azərbaycan.-2009.-6 yanvar.-S.5.