Azərbaycan Respublikası Tarif (Qiymət) Şurasının iclası keçirilmişdir

AzərTAc xəbər verir ki, Azərbaycan Respublikası Tarif (Qiymət) Şurasının 2008-ci il dekabrın 30-da keçirilmiş növbəti iclasında Azərbaycan Respublikası Prezidentinin rəhbərliyi ilə həyata keçirilən genişmiqyaslı islahatların tərkib hissəsi kimi ölkədə müasir informasiya-kommunikasiya texnologiyalarının tətbiqinin sürətləndirilməsi və vətəndaşların informasiya resurslarından istifadə imkanlarının genişləndirilməsi məqsədi ilə əhəmiyyətli qərarlar qəbul edilmişdir.

Rabitə və İnformasiya Texnologiyaları Nazirliyinin təklifləri əsasında iki məsələyə baxılmışdır. Şuranın qərarı ilə fiziki xətlə telefonlaşdırılması mümkün olmayan ərazilərdə yerləşən təhsil müəssisələri üçün "Teleradio" İstehsalat Birliyinə məxsus bina, sahə və qüllələrdə kənar təşkilatların avadanlığının yerləşdirilməsi və xidmət göstərilməsinə görə aylıq tariflərə 80 faiz güzəşt tətbiq olunacaqdır. Avadanlığa görə tətbiq olunan tariflər 0,54 manatdan 53,6 manatadək (ƏDV-siz), anten sistemlərinə görə tətbiq edilən tariflər isə 2 manatdan 105 manatadək (ƏDV-siz) səviyyəsində təsdiq olunmuşdur. Bu tariflər əvvəllər, müvafiq olaraq, 2,68 manatdan 268 manatadək (ƏDV-siz) və 10 manatdan 525 manatadək (ƏDV-siz) təşkil edirdi. Yeni tariflərin qəbul edilməsi təhsil sektorunda həmin xərclərə qənaət olunmasına imkan yaradacaqdır.

Şuranın iclasında internet xidmətinin göstərilməsi üçün tələb olunan rəqəmli kanalların tarifləri də müzakirə olunmuş və müvafiq qərar qəbul edilmişdir. Qərara əsasən, 2 Mbit/san şəhərdaxili rəqəmli kanalların (portların) istifadəyə verilməsi tarifləri digər abonentlər (büdcə təşkilatları istisna olmaqla) üçün 1200 manatdan 600 manata, onlardan aylıq istifadə tarifləri isə 320 manatdan 300 manata, rəqəmli rabitə kanallarının qoşulma və aylıq istifadə (Bakı şəhəri istisna olmaqla) tarifləri 240 manatdan 200 manata, hər tam və natamam 50 km məsafəyə görə 2 Mbit/san tutumundan istifadə tarifləri isə 180 manatdan 150 manata endirilmişdir.

Bu qərar internet provayderləri xidmətlərinin maya dəyərinin azalmasına, nəticə etibarilə son istifadəçilər üçün internet xidməti tariflərinin ən azı 15-20 faiz aşağı salınmasına imkan verəcəkdir.

Tarif (Qiymət) Şurasının qəbul etdiyi yeni qərarlar Azərbaycan Respublikası Prezidentinin 2008-ci il 10 iyun tarixli sərəncamı ilə təsdiq olunmuş "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı"na uyğun olaraq, fiziki xətlə telefonlaşdırılması mümkün olmayan ərazilərdə yerləşən məktəblərin internetə qoşulmasını təmin edəcək, vətəndaşların informasiya texnologiyalarına çıxışına daha əlverişli şərait yaradacaqdır.

Təsdiq olunmuş yeni tariflər 2009-cu il yanvarın 15-dən qüvvəyə minəcəkdir.

Azərbaycan.-2009.-6 yanvar.-S.7.