Beynəlxalq İnstitut referendumla bağlı paytaxtda və regionlarda monitorinq keçirəcəkdir

AzərTAc xəbər verir ki, martın 18-də keçiriləcək ümumxalq referendumu ilə bağlı MDB Parlamentlərarası Assambleyası iştirakçı dövlətlərdə demokratiyanın, parlamentarizmin inkişafının və vətəndaşların seçki hüquqlarına riayət olunmasının monitorinqi Beynəlxalq İnstitutunun Bakı filialı mərhələli monitorinqlər aparacaqdır. Bununla bağlı tədbirlər planı təsdiqlənmişdir.

Filialın direktoru Elman İmaməliyev demişdir ki, yaxın günlərdə paytaxtda, eləcə də Gəncə, Lənkəran və Qubada ümumxalq referendumu ilə bağlı monitorinqlərə başlanacaq. Monitorinqlərdə MDB Parlament Assambleyasının ekspertləri də iştirak edəcəklər.

E.İmaməliyev bildirmişdir ki, əsas məqsəd referendumqabağı seçici siyahılarının formalaşması, referendumla bağlı KİV-in, eləcə də beynəlxalq təşkilatların münasibətini öyrənməkdir.

Görüləcək işlərdən biri yerli müşahidəçilər üçün seminarların təşkilidir. Həmin seminarları aparacaq institutun və Parlament Assambleyasının ekspertləri ölkəmizə mütəmadi səfərlər edəcəklər.

Filialın direktoru qeyd etmişdir ki, bundan əvvəl keçirilən prezident seçkilərində kifayət qədər təcrübə toplayan filialın əməkdaşları seçici fəallığını öyrənmək üçün yerlərdə sosioloji sorğular da təşkil edəcəklər.

Tədbirlər planına əsasən gənclər arasında parlamentarizm və demokratiyanın inkişafı istiqamətində maarifləndirmə işləri də aparılacaqdır.

Sonda monitorinqin nəticələri institutun və assambleyanın ekspertləri tərəfindən təhlil olunacaq və hazırlanan yekun informasiyalar ictimaiyyətə açıqlanacaqdır.

Azərbaycan.-2009.-7 yanvar.-S.6.