Bir nəfərin 2 dəfədən artıq prezident seçilməsinə imkan verən dəyişiklik seçicilərin seçim hüququna hörmət əlamətidir

Yanvarın 7-də "Səs" qəzetinin redaksiyasında "Azərbaycan Respublikasının Konstitusiyasına əlavələr və dəyişikliklər edilməsi haqqında Azərbaycan Respublikasının Referendum Aktı" ilə əlaqədar "dəyirmi masa" keçirilmişdir. Tədbirdə Yeni Azərbaycan Partiyası (YAP) İdarə heyətinin üzvləri, Milli Məclisin komissiya sədrləri, deputatlar və siyasi partiyaların rəhbərləri və ictimaiyyət nümayəndələri iştirak etmişlər.

YAP idarə heyətinin üzvü, Milli Məclisin Aqrar siyasət daimi komissiyasının sədri Eldar İbrahimov, Ana Vətən Partiyasının (AVP) sədri, deputat Fəzail Ağamalı və digər natiqlər martın 18-də keçiriləcək referendumun xalq üçün əhəmiyyətindən danışmışlar. Çıxışlarda qeyd olunmuşdur ki, nəzərdə tutulmuş əlavələr və dəyişikliklər Konstitusiyanı daha da təkmilləşdirəcəkdir. Əlavələr və dəyişikliklərin həm də insan hüquq və azadlıqlarına xidmət edəcəyi vurğulanmışdır. Bildirilmişdir ki, bir nəfərin 2 dəfədən artıq prezident seçilməsinə imkan verən dəyişiklik seçicilərin seçim hüququna hörmət kimi qiymətləndirilməlidir.

Müzakirələrdə bildirilmişdir ki, sözügedən dəyişikliklər zamanın tələbi, cəmiyyətin sosial sifarişi və Azərbaycanın müasir inkişafı üçün olduqca önəmlidir.

AzərTAc

Azərbaycan.-2009.-8 yanvar.-S.5.