İsrail Qəzzəni bombardman edir

İsrail qoşunlarının Qəzzə bölməsində hərbi əməliyyatı davam edir. Ərazidə müxtəlif hədəflər qurudan, havadan və dənizdən müntəzəm olaraq zərbələr endirilir. Öz növbəsində Fələstin partizanları İsrailin yaxınlıqdakı yaşayış məntəqələrini "Qəssam" və "Qrad" raketləri ilə atəşə tuturlar. Tibbi mənbələrin verdiyi məlumata görə, əməliyyat başlayandan bəri 680 fələstinli həlak olmuş, 3075 nəfər yaralanmışdır. Həlak olanların və yaralananların təxminən yarısı uşaqlar və qadınlardır.

Dünən İsrail elan etmişdir ki, hər gün yerli vaxtla saat 13-dən 16-dək atəşi dayandıracaq. Bu müddət ərzində Qəzzə əhalisinin humanitar yardım almasına imkan veriləcək. Özü də əhali yalnız hərbi əməliyyatdan əvvəl aldığı həcmdə humanitar yardıma ümid edə bilər.

Bu arada qanlı toqquşmalara son qoymaq üçün diplomatik səylər davam edir. Misir Prezidenti Hüsni Mübarək Qəzzə bölməsində atəşin dayandırılması planı təklif etmişdir. Planın təfsilatı Misir liderinin Fransa Prezidenti Nikola Sarkozi ilə birgə mətbuat konfransında açıqlanmışdır.

Təklif olunan sxemə görə, tərəflər dərhal barışıq elan edir və danışıqlara başlayırlar. Danışıqların nəticəsi olaraq uzunmüddətli saziş imzalanır. Sazişə uyğun olaraq, Qəzzə bölməsinin mühasirəsi qaldırılır. Mübarəkin fikrincə, Fələstin və İsrail nümayəndələri arasında danışıqlar neytral ərazidə - Misirdə keçirilməlidir.

Öz növbəsində Sarkozi məlumat vermişdir ki, Misirin irəli sürdüyü təklifin məqsədi İsrailin Qəzzədə hərbi əməliyyatını dayandırmaqdır. O həmçinin demişdir ki, yaxın vaxtlarda İsrail və Misir nümayəndələri arasında keçiriləcək görüşdə sərhədlərin təhlükəsizliyi məsələsi müzakirə olunacaq.

ABŞ-ın dövlət katibi Kondoliza Rays və Fələstin Muxtariyyətinin başçısı Mahmud Abbas Misir Prezidentinin təşəbbüsünü dəstəkləmişlər. Bununla belə, münaqişə tərəfləri - İsrail və HƏMAS hələlik təklifə münasibət bildirməmişlər. İsrailin BMT-dəki daimi nümayəndəsi Qabriel Şalev demişdir ki, rəsmi Təl-Əviv Misirin təklifinə "çox ciddi" yanaşacaq. Öz növbəsində HƏMAS-ın nümayəndələri məsləhətləşmək üçün Dəməşqə uçmuşlar.

Eyni zamanda Qəzzə bölməsində yaranmış vəziyyət BMT Təhlükəsizlik Şurasında müzakirə olunur. Lakin müzakirələrdə hələlik irəliləyiş müşahidə olunmur.

Azərbaycan.-2009.-8 yanvar.-S.7.