"Neft Daşları"nda qaz-kompressor stansiyası genişləndirilir

1994-cü ilin sentyabrında istismara buraxılmış stansiya əsasən "Günəşli" və "Çıraq" yataqlarından daxil olan aşağı təzyiqli səmt qazının sıxılması üçün nəzərdə tutulmuşdur. Stansiyaya 5 atmosferlə daxil olan qaz buradan 55 atmosfer təzyiqlə çıxır. 11 qat artıq enerji alan mavi yanacaq borular vasitəsilə yüksək sürətlə sahilə nəql edilir.

Stansiya inşa edilməmişdən əvvəl bütün aşağı təzyiqli qaz boruya yığılması mümkün olmadığından atmosferə buraxılırdı. SKS-2 öz fəaliyyətinin ilk dövründə 9 iri qaz-turbin kompressor aqreqatından ibarət olmuş, onun ümumi gücü sutkada 4,2 milyon kubmetr təşkil etmişdi. Lakin qaz hasilatı artırıldığından yeni güclər tələb olunurdu. 1998-ci ildə stansiyanın işi dayandırılmadan kompressor aqreqatları konstruksiyalarının dəyişdirilməsi ilə burada modernləşdirmə aparılmışdır. Bu, sutkalıq gücü 4,2 milyon kubmetrdən 5,8 milyon kubmetrədək artırmağa imkan vermişdir. 2001-ci ilin martında daha 3 aqreqat işə salınaraq, stansiyanın gücü 7,4 milyon kubmetrə çatdırılmışdır. Hazırda stansiyada 12 aqreqat fəaliyyət göstərir. Lakin hələ ki, stansiyada profilaktika və baxış zamanı işə salmaq üçün rezerv maşınlar mövcud deyil.

Qeyd edilməlidir ki, ötən müddət ərzində "Günəşli" yatağından qaz hasilatı iki dəfə artırılmışdır. Buraya həmçinin "Çıraq" yatağından sutkada 1 milyon kubmetr səmt qazı daxil olur. Bu səbəbdən ARDNŞ rəhbərliyi 2 nömrəli SKS-in sutkalıq gücünü daha 3,6 milyon kubmetr artırmaq məqsədilə stansiyada 4 yeni aqreqat işə salaraq, onu genişləndirmək qərarı vermişdir. İnşa işlərinin baş podratçısı "Neftqaztikinti" trestidir. Artıq fəaliyyətdə olan stansiyada əlavə meydançanın tikintisi başa çatdırılmışdır.

Hazırda qaz-turbin aqreqatları üçün özüllərin inşası aparılır. Obyektin sifarişçisi "28 May" NQÇİ-dir. İstifadə edilən avadanlıq ABŞ-ın "Solar" şirkətinə aiddir. Təkmilləşdirilmiş konstruksiyaya malik bu aqreqatlar yüksək etibarlılığa malikdir və bütün mərhələlərdə avtomatik idarəetmə sistemi ilə təchiz edilib.

Yaxın aylarda quraşdırma işlərinə başlanacaq. Stansiyanın bu ilin aprel ayında ümumilikdə 11 milyon kubmetr sutkalıq güclə istifadəyə veriləcəyi gözlənilir.

Azərbaycan.-2009.-13 yanvar.-S.6.