"İlham Əliyevin modernləşmə xəttində azərbaycançılıq ideologiyası və dövlətçilik strategiyası" mövzusunda "dəyirmi masa" görüşü keçirilmişdir

Azərbaycan Milli Elmlər Akademiyasında (AMEA) "İlham Əliyevin modernləşmə xəttində azərbaycançılıq ideologiyası və dövlətçilik strategiyası" mövzusunda "dəyirmi masa" görüşü keçirilmişdir.

Görüşü açan AMEA-nın prezidenti, akademik Mahmud Kərimov bildirmişdir ki, Prezident İlham Əliyev tərəfindən həyata keçirilən sosial-mədəni modernləşmə xəttinin getdikcə daha sürətlə reallaşması, ictimai həyatın bütün sahələrindəki köklü dəyişikliklər elmimiz qarşısında da ciddi vəzifələr qoyur. Bu istiqamətdə müzakirələrin aparılması, diskussiyaların təşkili olduqca vacibdir. Son vaxtlar həmin məsələlər ətrafında publisistik müstəvidə fikir mübadilələrinin aparılması geniş vüsət almışdır.

"Dəyirmi masa"da müzakirəyə çıxarılan mövzunun aktuallığını vurğulayan M.Kərimov demişdir ki, azərbaycançılıq ideologiyası və dövlətçilik strategiyası məsələlərini hərtərəfli təhlil etmək Azərbaycanın gələcəyini proqnozlaşdırmaq baxımından çox böyük əhəmiyyətə malikdir.

Azərbaycançılıq ideologiyasının formalaşması və inkişafında xalqımızın ümummilli lideri Heydər Əliyevin əvəzsiz rolunu xatırladan AMEA-nın prezidenti dövlətimizin başçısı İlham Əliyev tərəfindən də bu istiqamətdə mühüm işlər görüldüyünü bildirmişdir.

"Dəyirmi masa"da çıxış edən AMEA-nın Tarix İnstitutunun direktoru, akademiyanın müxbir üzvü, Milli Məclisin deputatı Yaqub Mahmudov, Fəlsəfə və Siyasi-Hüquqi Tədqiqatlar İnstitutunun direktoru İlham Məmmədzadə, Milli Məclisin deputatı Gültəkin Hacıyeva, AMEA Rəyasət Heyətinin elmi katibi Seyran Xavəri və başqaları bildirmişlər ki, müzakirəyə çıxarılmış mövzu xalqımız və dövlətimiz üçün çox vacib, taleyüklü və həyati əhəmiyyətə malik məsələdir. Vurğulanmışdır ki, azərbaycançılıq ideologiyasını dövlətçiliyimizin əsası hesab edən ulu öndər Heydər Əliyev onun həyata keçirilməsi istiqamətində də tarixi addımlar atmışdır. Naxçıvanda Ali Məclisin sədri olarkən 31 dekabr - Dünya Azərbaycanlılarının Həmrəyliyi Gününün təsis edilməsi, Prezident olduğu dövrdə Dünya azərbaycanlılarının I qurultayının Bakıda yüksək səviyyədə təşkili və keçirilməsi, milli birliyin və həmrəyliyin möhkəmləndirilməsi baxımından gördüyü digər tədbirlər bunun əyani sübutudur.

Çıxışlarda mövzu ilə əlaqədar Azərbaycan Prezidenti Administrasiyasının rəhbəri, akademik Ramiz Mehdiyevin məqalələrinin, xüsusən, ötən ilin son günlərində çap olunmuş "Zaman haqqında düşünərkən və elitanı transformasiya edərkən: varislik və innovasiyalılıq" əsərinin böyük nəzəri əhəmiyyəti qeyd edilmişdir. Bildirilmişdir ki, milli ideologiya ilə bağlı bu əsərlərdə irəli sürülən fikirlər AMEA-nın institutları üçün sosial sifariş kimi qəbul edilməli və həmin istiqamətdə elmi fəaliyyət daha da canlandırılmalıdır. Azərbaycançılıq ideologiyası və dövlətçilik strategiyası ilə bağlı araşdırmalar aparılmasında elmi tədqiqat müəssisələri və alimləri yaxından və fəal iştirak etməlidirlər. Həmin ideologiyanın humanitar elm və ziyalılar qarşısında irəli sürdüyü vəzifələrin həllini ləngidən sosial, siyasi, psixoloji səbəblər, etno-psixoloji stereotiplər müəyyən edilməli və aradan qaldırılmalıdır.

Görüşdə səslənmiş fikirlər əsasında yekun sənədin hazırlanması qərara alınmışdır.

AzərTAc

Azərbaycan.-2009.-16 yanvar.-S.4.