"Pakistan - Dünya" jurnalının xüsusi nömrəsi Azərbaycana həsr olunub

Pakistan Senatının Xarici Əlaqələr Komitəsinin nəşr etdirdiyi "Pakistan -Dünya" jurnalının dekabr nömrəsi Azərbaycana həsr olunmuşdur.

Azərbaycanın Pakistandakı səfirliyindən bildirmişlər ki, bu ölkə parlamentinin yuxarı palatası olan Senatın Xarici Əlaqələr Komitəsinin senatorlarından ibarət nümayəndə heyəti komitənin sədri Müşahid Hüseynin rəhbərliyi ilə ötən ilin iyulunda Azərbaycanda səfərdə olmuşdur. Senator Müşahid Hüseynin müraciəti ilə başlayan jurnalda nümayəndə heyətinin ölkəmizə səfəri, Azərbaycan Prezidenti İlham Əliyevlə, Milli Məclisin Sədri Oqtay Əsədov, xarici işlər naziri Elmar Məmmədyarov, sənaye və energetika naziri Natiq Əliyevlə görüşlərindən bəhs edən materiallara geniş yer verilmişdir.

Nümayəndə heyətinin Azərbaycan-Pakistan parlamentlərarası işçi qrupunun üzvləri, Milli Məclisin Beynəlxalq münasibətlər və parlamentlərarası əlaqələr, sosial siyasət, təhlükəsizlik və müdafiə məsələləri daimi komissiyalarının üzvləri, habelə Yeni Azərbaycan Partiyasının sədr müavini-icra katibi Əli Əhmədovla görüşlərindən də bəhs olunmuşdur.

AzərTAc

Azərbaycan.-2009.-22 yanvar.-S.7.