Azərbaycanın BMT yanında daimi nümayəndəliyində anma mərasimi keçirilmişdir

Qanlı Yanvar faciəsinin ildönümü ilə əlaqədar Azərbaycan Respublikasının BMT yanında daimi nümayəndəliyində anma mərasimi keçirilmişdir.

Daimi nümayəndəliyin əməkdaşları, Nyu-Yorkda yaşayan soydaşlarımız əvvəlcə 1990-cı ilin yanvarında xalqımızın azadlığı naminə öz həyatlarını qurban vermiş Azərbaycanın oğul və qızlarının xatirəsini bir dəqiqəlik sükutla yad etmişlər.

Daimi nümayəndəliyin müşaviri Tofiq Musayev, Azərbaycan-Nyu-York Assosiasiyasının vitse-prezidenti Zəminə Mirhadıyeva və başqaları çıxış edərək sovet imperiyası qoşunlarının törətdiyi qırğından danışmış, 20 Yanvarın həm də bir qəhrəmanlıq tarixi olduğunu və şəhidlərimizin xatirəsinin daim Azərbaycan xalqının yaddaşında qalacağını bildirmişlər.

Qanlı Yanvar faciəsinin ildönümü ilə əlaqədar BMT-nin baş katibinə, BMT Katibliyinin əsas idarələrinə və üzv dövlətlərin daimi nümayəndəliklərinə press-reliz göndərilmişdir.

AzərTAc

Azərbaycan.-2009.-23 yanvar.-S.4.